विद्यार्थी, व्यापारी, चाकरमान्यांची वाढली चिंता; कारण चेन्नई एक्‍स्प्रेसला रेल्वेचा "रेड सिग्नल'! 

सोलापूर : गेल्या चार दशकांपासून कुर्डुवाडी-सोलापूर यादरम्यान प्रवास करण्यासाठी चाकरमानी, विद्यार्थी, व्यापारी व सर्वसामान्यांच्या हक्काची असलेल्या मेल एक्‍स्प्रेसला रेल्वे विभागाने रेड सिग्नल दाखविला आहे. सकाळी 7.30 ला कुर्डुवाडीतून मुंबई-चेन्नई मेल ही हक्काची गाडी. परत गावाकडे जाण्यासाठी सोलापुरातून सायंकाळी 6.15 ला असलेली ही गाडी पुणे, मुंबईकडे जाणाऱ्या प्रवाशांसह दौंड, जेऊर, केम, कुर्डुवाडी, माढा, मोहोळ परिसरातील प्रवाशांची लाईफलाइन झाली होती. रेल्वेने गाड्यांच्या वेळापत्रकातून आता चेन्नई-मुंबई मेल ही रेल्वे कायमस्वरूपी बंद केल्याने सर्वांचीच चिंता वाढली आहे. 

हेही वाचा : डंख कोरोनाचा; पत्नी तर गेली, तिच्या आत्म्याला तरी शांती मिळावी म्हणून आसामवरून तो पुन्हा सोलापुरात आला 

सुरवातीला फेब्रुवारीत, नंतर जूनमध्ये जाहीर झालेल्या रेल्वेच्या वेळापत्रकातून चेन्नई-मुंबई गाडीला वगळले आहे. करमाळा, माढा, मोहोळ या भागातून दैनंदिन कामानिमित्त प्रवास करणारे चाकरमानी, महाविद्यालयीन विद्यार्थी व व्यापारी यांच्यासाठी विजयपूर गाडी दररोज सोडण्याची मागणी व कोणार्क गाडीला थांबा देण्याची मागणी सोलापूर जिल्हा प्रवासी संघटनेचे अध्यक्ष हर्षद मोरे यांनी केली आहे. मध्य रेल्वेच्या प्रबंधकांकडे निवेदनाद्वारे ही मागणी करण्यात आली आहे.

कोल्हापूर - सोलापूर या गाडीनंतर आता सोलापूरकडे जाण्यासाठी मेल एक्‍स्प्रेस ही दैनंदिन गाडी होती. चेन्नई मेल ही गाडी रद्द झाल्याने दौंडपासून कुर्डुवाडीपर्यंत विजयपूर पॅसेंजरवर ताण येण्याची शक्‍यता आहे. यामध्ये विजयपूर रेल्वे आठवड्यातून चारच दिवस असल्याने इतर नियमित अप-डाउन करणाऱ्यांना आता त्या दिवशी पहाटे सहाच्या गाडीशिवाय दुसरा पर्याय नाही. भुवनेश्वर-मुंबई ही कोणार्क गाडी नव्या वेळेस 6.15 वाजता सोलापूरहून निघणार आहे. त्यामुळे कोणार्क गाडीचे थांबे वाढवण्याचीही मागणी करण्यात आली आहे. 

हेही वाचा : धक्कादायक ! नातवंडांसह पोटच्या मुलीने निराधार आईला मारहाण करीत घराबाहेर हाकलले 

याबाबत सोलापूर जिल्हा प्रवासी संघटनेचे अध्यक्ष हर्षद मोरे म्हणाले, सोलापूर जिल्ह्यातील हजारो रेल्वे प्रवाशांची सोय व्हावी यासाठी विजयपूर रेल्वे पूर्ण आठवडाभर सुरू करावी. या गाडीला केम, माढा, मोहोळ या ठिकाणी थांबा द्यावा. भुवनेश्वर ते मुंबई या कोणार्क एक्‍स्प्रेसला मोहोळ, माढा, कुर्डुवाडी, केम, जेऊर या ठिकाणी थांबा देण्याची मागणी रेल्वे प्रबंधक यांच्याकडे केली आहे. मागण्या मान्य न झाल्यास हजारो प्रवासी तीव्र आंदोलन करतील. 

संपादन : श्रीनिवास दुध्याल