फेसबुकवर खोटी माहिती पसरवली; शांतता कमिटी सदस्यांसह चौघांवर गुन्हा 

सोलापूर : लॉकडाउन आदेश मोडणाऱ्यांवर पोलिसांकडून शिक्‍के मारले जाणार आहेत, अशी पोस्ट फेसबुकवरून खोटी माहिती पसरवल्याप्रकरणी शांतता कमिटीच्या सदस्यांसह चौघांवर सायबर पोलिस ठाण्याने गुन्हा दाखल केला आहे. 

आईची औषधे आणण्यासाठी गेलेल्या पोलिस कर्मचाऱ्यालाच बसले फटके!

अमर ज्ञानदेव पवार (रा. जय मल्हार चौक, बुधवार पेठ, सोलापूर), लक्ष्मण बाबूराव गायकवाड (रा. उत्तर सदर बझार, सोलापूर), विक्रम रामचंद्र वाडे (रा. उत्तर सदर बझार, सोलापूर), सुरेश सिद्राम पाटुळे (रा. उत्तर सदर बझार, सोलापूर) अशी आरोपींची नावे आहेत. यातील दोघे आरोपी हे शांतता कमिटीचे सदस्य असल्याचे सांगण्यात आले. पोलिस आयुक्तालयातर्फे विनाकारण रस्त्यावर फिरणाऱ्यांवर शिक्के मारण्यात येणार आहेत, असे सांगून पोलिस आयुक्त अंकुश शिंदे यांचे छायाचित्र फेसबुकवरील पोस्टमध्ये वापरण्यात आले होते. 

"कोरोना'च्या पार्श्‍वभूमीवर कोणत्याही प्रकारे खोटी माहिती पसरवणे, व्हिडिओ अपलोड करणे, कोरोना संक्रमित रुग्णांची नावे प्रसिद्ध करणे, अफवा पसरवणे कायद्याने गुन्हा आहे. अशा लोकांवर राष्ट्रीय आपत्ती व्यवस्थापन कायद्यानुसार गुन्हा दाखल केला जात असून एक वर्ष कारावास आणि दंडाच्या शिक्षेची तरतूद आहे. 
- अरुण फुगे, 
पोलिस निरीक्षक, सायबर पोलिस ठाणे