येथे महिलांना मिळेल सवलतीच्या दरात रक्त

सोलापूर - बार्शीच्या रामभाई शाह रक्तपेढीत महिलांना 50 टक्के सवलतीच्या दरात रक्त मिळणार आहे. महिलांसाठी अशा प्रकारची सवलत देणारी राज्यातील ही एकमेव रक्तपेढी असल्याची माहिती रक्तपेठीचे उपाध्यक्ष अजित कुंकूलोळ यांनी आज पत्रकार परिषदेत दिली. 

हे ही वाचा... विठुरायाच्या भक्तामध्येही कोरोनाची भिती

महाराष्ट्रातील महिला व बालिकांना आरोग्यदायी जीवन जगता यावे, महिलांविषयी सामाजिक बांधिलकीतून कृतज्ञता व्यक्त करण्यासाठी जागतिक महिला दिनाचे औचित्य साधत 50 टक्के सवलतीच्या दरात रक्तपुरवठा करण्यासाठी नारी शक्ती सन्मान योजना बार्शीच्या इंडियन रेडक्रॉस सोसायटीच्या श्रीमान रामभाई शाह रक्तपेढीने सुरू केली आहे. 

श्री. कुंकूलोळ म्हणाले, रक्तपेढीच्या उत्कृष्ट कार्याबद्दल राष्ट्रपती व राज्यपालांनी शाह रक्तपेढीस वेळोवेळी गौरविले आहे. जागतिक स्तरावरील इंडियन रेड क्रॉस सोसायटी या सामाजिक संस्थेच्या शतक महोत्सवी वर्षानिमित्त एक विधायक व व्यापक समाज उपयोगी उपक्रमांतर्गत नारी शक्ती सन्मान योजना सुरू केली आहे. 

हे ही वाचा... साईबाबांच्या झोळीला हात घातल्यास...

यापूर्वी इंडियन रेड क्रॉस सोसायटी संचलित श्रीमान रामभाई शाह रक्तपेढीने 58 वर्षे वयाच्या पुढील ज्येष्ठ नागरिकांसाठी मागील पाच वर्षापासून 50 टक्के सवलतीच्या दरात रक्तपुरवठा सुरू केला आहे. या योजनेच्या माध्यमातून चार वर्षाच्या काळात रक्तपेढीने ज्येष्ठ नागरिकांना सुमारे 10 हजार 816 रक्त पिशवीचा पुरवठा केला असल्याचेही त्यांनी सांगितले. पत्रकार परिषदेसाठी सचिव सुभाष जवळेकर, व्यवस्थापक प्रशांत बुडूख, रेडक्रॉस सोसायटीचे सदस्य संतोष सूर्यवंशी उपस्थित होते.