सरपंच निवडीसाठी घोडेबाजार सुरू; नंदेश्वरात सत्तेसाठी विरोधी गटाशी हात मिळवणी ?

मंगळवेढा (सोलापूर) : तालुक्यातील सरपंच निवड एकाच दिवशी 11 फेब्रुवारीला होणार असल्या तरी सत्तेसाठी फोडाफोडीच्या हालचालींनी वेग घेतला आहे.  त्यामध्ये नंदेश्‍वरातील घडामोडी निर्णायक वळणावर असून सत्ताधारी गटाने विरोधी गटाला जवळ करत त्यांचेही सदस्य अज्ञातस्थळी नेल्यामुळे सरपंच व उपसरपंच कोणत्या गटाचा होणार याची उत्सुकता लागून राहिली.

सोलापूरच्या बातम्यांसाठी येथे क्लिक करा 

नुकत्याच झालेल्या 22 ग्रामपंचायतीच्या निवडणुकीत काठावर सत्ता मिळवलेल्या सिध्दापूर, लवंगी, आसबेवाडी, बालाजी नगर, नंदेश्‍वर, डोणज, अरळी या गावात एका सदस्यामुळे सत्ता मिळाली. अरळी येथे चिठठी सदस्य सत्ता मिळाली तर बालाजी नगर येथे समसमान मते पडली आणि चिठठीमुळे सत्ता गमवावी लागली. त्यामुळे काठावर बहुमत मिळालेल्या गावात सत्तेसाठी विविध अस्त्राचा वापर सुरु केला आहे. गणेशवाडीचे सरपंचपद रिक्त राहणार आहे.

हे ही वाचा : पंढरपुरात बाप लेकीच्या नात्याला काळीमा; स्वतःच्या मुलीवरच अत्याचाराचा प्रयत्न

माचणूर, मरवडे, भोसे, लेंडवेचिंचाळे, बोराळे, हुलजंती, सलगर बु, कर्जाळ कात्राळ, तांडोर या गावात बहुमत मोठे मिळाल्याने स्थानिक नेत्यांनी ठरवेल त्याला संधी मिळणार आहे. त्यामुळे या गावात राजकीय घोडेबाजार होणार नाही तरी सावध पावित्रा घेतला जात आहे. तिर्थक्षेत्र विकास निधी 14 व 15 व्या वित्त आयोगाचा निधी थेट ग्रामपंचायतीच्या खात्यावर आल्यामुळे ग्रामपंचायती मालामाल झाल्या. त्यामुळे विकासकामाबरोबर आर्थिक लाभाबरोबर गटबांधणी होत असल्यामुळे ग्रामपंचायतीवर लक्ष केंद्रीत केले. आगामी पोटनिवडणुकीमुळे तालुक्यातील राजकीय नेत्यांनी गावपातळीवरील नेत्यांना ताकद दिली. त्यामुळे सरपंच निवड होईपर्यत राजकीय हालचाली निर्णायक वळणावर असून नंदेश्‍वरात निवडणुकीचा गुलाल बाजूला होईपर्यत सर्व सदस्य अज्ञानस्थळी गेले होते. 

ताज्या बातम्यांसाठी डाऊनलोड करा ई-सकाळचे ऍप 

परंतु सरपंचपदासाठी त्यातील एकाने दुसऱ्या गटाशी हातमिळवणी करण्याचा प्रयत्न केला. परंतु पराभूत झालेल्या गटातील तीन सदस्याला बहुमत मिळालेल्या गटाने जवळ करत ते सदस्यही अज्ञातस्थळी नेले. त्यामुळे सरपंच कोण होणार? आणि उपसरपंचपद पराभूत गटाला मिळणार असल्याची चर्चा गावात असली तरी निवडीनंतर या पदावर कोण विराजमान होणार? याची उत्सुकता लागून राहिली आहे. सध्या सरपंच निवडीच्या निमित्ताने अनेक राजकीय नेत्यांनी भविष्यातील स्थानिक स्वराज्य संस्थेच्या निवडणुकीतील राजकीय गणिते जुळविण्याचा प्रयत्न केल्याचे दिसू लागले.