सोलापूरकरांचे स्वप्न पूर्ण झाले, उजनी 100 टक्के भरले 

सोलापूर : सोलापुरात किती पाऊस पडतो या पेक्षा सोलापूर शहर व जिल्ह्यातील नागरिकांचे लक्ष कायमस्वरुपी उजनीवर असते. उजनीत किती पाणी आहे, उजनी कधी भरणार? हे नेहमीचेच प्रश्‍न. सोलापूर शहर व जिल्ह्याची तहान भागविणारे, सोलापूर जिल्ह्यातील शेती, उद्योग, अर्थकारण चालविणारे उजनी धरण आज शंभर टक्के भरले आहे. सोलापूरकरांसाठी ही मोठी गुडन्यूज आज मिळाली आहे. 

उजनी धरणातून सध्या भीमा-सीना बोगद्याद्वारे सीना नदीत 900 क्‍युसेकने पाणी सोडले जात आहे. सीना माढा उपसा सिंचन योजनेसाठी 262 क्‍युसेकने व मुख्य कालव्यातूनही पाणी सोडले जात आहे. दौंड येथील मोठा विसर्ग उजनीत मिसळत आहे. पुणे जिल्ह्यात झालेल्या पावसामुळे व खडकवासला, मुळशी, पवना यासह अन्य धरणातून नदीमध्यहे मोठ्या प्रमाणात पाणी सोडण्यात आले आहे. भीमा नदीतून हे पाणी उजनीत येत असल्याने उजनी येणाऱ्या पाण्याचा येवा वाढला आहे.