कोरोनामुक्‍तीच्या उंबरठ्यावरील प्रभाग 

धडपड कोरोनामुक्‍तीची : प्रभाग एक 
सोलापूर : पुणे, कोल्हापूर, सातारा, उस्मानाबाद, नगर या जिल्ह्यांमध्ये कोरोनाचा प्रवेश झाल्यानंतरही सोलापूर कोरोनापासून दूर होते. मात्र, 14 एप्रिलला शहरात पहिला रुग्ण सापडला आणि तिथून कोरोनाचा कहर सुरू झाला. शहरातील रुग्णसंख्या आता दहा हजारांकडे वाटचाल करीत आहे. परंतु, नागरिकांच्या प्रयत्नातून शहरातील प्रभाग क्रमांक एकमधील 283 रुग्णांपैकी 255 रुग्णांनी कोरोनावर मात केली आहे. तर प्रभागातील ऍक्‍टिव्ह रुग्णसंख्या आता चार असून नागरिकांच्या प्रयत्नातून हा प्रभाग आता कारोनामुक्‍तीच्या उंबरठ्यावर आहे. 

शहरात 15 नागरी आरोग्य केंद्रे असून आठ झोन (विभागीय) कार्यालये आहेत. आतापर्यंत (26 ऑक्‍टोबर) शहरातील नऊ हजार 425 व्यक्‍तींना कोरोनाची लागण झाली असून त्यातील 526 रुग्णांचा मृत्यू झाला आहे. तर शहरात आता ऍक्‍टिव्ह रुग्णांची संख्या 433 वर आली आहे. शहरातील शेळगी, नई जिंदगी, रामवाडी, जिजामाता, देगाव, विडी घरकूल, मजरेवाडी, जोडभावी पेठ, भावनाऋषी, बाळे, मधुरा सनसिटी, साबळे हॉस्पिटल, सोरेगाव, दाराशा व आउट ऑफ सिटी सिव्हिल या 15 नागरी आरोग्य केंद्रांपैकी रामवाडी केंद्र परिसरात सर्वाधिक एक हजार 348 रुग्ण आढळले आहेत. तर त्यातील एक हजार 221 रुग्णांनी कोरोनावर मात केली असून 62 रुग्णांचा मृत्यू झाला आहे. शहरातील एकूण प्रभागांमध्ये प्रभाग एक हा रुग्णसंख्येत अकराव्या क्रमांकावर असून मृत्यूच्या संख्येत सहाव्या क्रमांकावर आहे. 

नागरिकांनी विनाकारण घराबाहरे जाणे टाळले 
शहरात कोरोनाचा प्रादुर्भाव वाढू लागल्यानंतर प्रभाग एकमधील नागरिकांनी विनाकारण घराबाहेर जाणे टाळले. दुसरीकडे मास्कचा वापर, सोशल डिस्टन्सिंगचा वापर करीत प्रशासनाच्या नियमांचे पालन केले. त्यामुळे आता हा प्रभाग कोरोनामुक्‍तीच्या उंबरठ्यावर पोहचला आहे. या प्रभागात रवी गायकवाड, राजश्री कणके, निर्मला तांबे आणि अविनाश पाटील हे नगरसेवक आहेत. त्यांनीही नागरिकांना नियमांचे पालन करण्याचे सातत्याने आवाहन केले. नागरिकांनी कोरोनाला हद्दपार करण्याचा संकल्प केल्याने आता हा प्रभाग कोरोनामुक्‍त होईल, असा विश्‍वास आहे. 
- 

प्रभाग एकसंबंधी ठळक बाबी... 

• - आतापर्यंत एक नंबर प्रभागात आढळले 283 कोरोना पॉझिटिव्ह 
• - एकूण रुग्णांमधील 255 रुग्णांनी केली कोरोनावर मात 
• - प्रभाग एकमध्ये आतापर्यंत कोरोनामुळे 24 रुग्णांचा झाला मृत्यू 
• - अन्य प्रभागांच्या तुलनेत हा प्रभाग मृत्यू संख्येत सहावा तर रुग्णसंख्येत अकराव्या क्रमांकावर 

संपादन : अरविंद मोटे