बेळगावात महापालिकेवर भगवा फडकवा; खासदार संजय राऊतांचं आवाहन

बेळगाव : बेळगावची मानबिंदू असलेल्या महानगरपालिकेच्या निवडणुकीत (belgaum election 2021) मोठ्या संख्येने मराठी भाषिक नगरसेवक निवडून आले पाहिजेत. बेळगाव महापालिकेवर मराठी भाषकांचे वर्चस्व अबाधित राहिले पाहिजे. यासाठी शिवसैनिक व तमाम मराठी भाषिकांनी महाराष्ट्र एकीकरण समितीच्या झेंड्याखाली एकत्र येऊन बेळगाव महापालिकेवर भगवा फडकवा, असे आवाहन खासदार संजय राऊत (sanjay raut) यांनी केले आहे.

बेळगावच्या शिवसेना पदाधिकाऱ्यांनी सोमवारी मुंबई (mumbai) येथे खासदार संजय राऊत, शिवसेनेचे सचिव आणि खासदार अनिल देसाई तसेच महाराष्ट्राचे उद्योगमंत्री सुभाष देसाई (subhash desai) यांची भेट घेतली. या भेटी दरम्यान बेळगावच्या शिवसैनिकांनी तोंडावर आलेल्या बेळगाव महानगरपालिकेच्या (belgaum munciple corporation) निवडणुकीसंदर्भात खासदार संजय राऊत आणि अनिल देसाई यांना माहिती देत सविस्तर चर्चा केली.

यावेळी संजय राऊत म्हणाले, महाराष्ट्र एकीकरण समिती (maharashtra ekikaran samiti) तसेच बेळगावातील तमाम मराठी संघ संस्थांनी एकत्र येऊन महापालिकेवर सत्ता प्रस्थापित करणे महत्त्वाचे आहे. महापालिकेच्या निवडणुकीत तमाम मराठी भाषिकांनी एकदिलाने काम करणे आवश्यक आहे. याकामी शिवसैनिकांनीही पुढाकार घेत आपली ताकद पणाला लावली पाहिजे, असे आवाहन खासदार संजय राऊत आणि मंत्री अनिल देसाई यांनी केले.

या भेटीदरम्यान शिवसेनेचे बेळगाव उपजिल्हाप्रमुख बंडू केरवाडकर, शहर प्रमुख आणि माजी नगरसेवक दिलीप बैलुरकर, तालुकाप्रमुख सचिन गोरले, चंद्रकांत कोंडुस्कर, प्रकाश राऊत, विश्वनाथ येळ्ळूरकर, पिराजी शिंदे आदी उपस्थित होते.