बेळगावात ‘आरसीयू’ बसमुळे होतीये विद्यार्थ्यांची गैरसोय ; वेळापत्रक कोलमडले

बेळगाव : राणी चन्नम्मा विद्यापीठातील (आरसीयु) बससेवा सुरळीत नसल्याने विद्यार्थ्यांना नाहक अडचणींचा सामना करावा लागत आहे. परिवहन महामंडळाने याकडे लक्ष देऊन आरसीयूची बससेवा सुरळीत करावी, अशी मागणी विद्यार्थ्यांतून होत आहे.

विद्यापीठ बेळगावपासून २० किमी अंतरावर आहे. यामुळे विद्यापीठात जाण्यासाठी विद्यार्थ्यांना फक्त बससेवेचा आधार घ्यावा लागतो. काही विद्यार्थी स्वतःची दुचाकी घेऊन जातात. मात्र, ९५ टक्के विद्यार्थी हे बसमधून जातात. विद्यापीठाला सकाळच्या टप्प्यातील बससेवा व्यवस्थित आहे. मात्र, दुपारी व सायंकाळी साडेचारच्या दरम्यान, बसेस व्यवस्थित नसल्याने विद्यार्थ्यांना अडचणी येत आहेत. यामुळे बससेवा सुरळीत सुरू करण्याची मागणी जोर धरत आहे.

हेही वाचा -  शेतकरी नवरा नको गं बाई मला ? शेतकऱ्याच्या लग्नाची सोशल मिडीयावर चर्चा -

कोरोनामध्ये बंद असलेली महाविद्यालये १७ नोव्हेंबरपासून सुरु झाली आहेत. विद्यापीठातील पदव्युत्तर वर्गही १७ पासून सुरु झाले आहेत. यामुळे विद्यार्थ्यांची ये-जा वाढली आहे. विद्यापीठात प्रथम वर्षातील विद्यार्थ्यांना सकाळी व द्वितीय वर्षातील विद्यार्थ्यांचे दुपारी वर्ग घेतले जात आहेत. यामुळे सकाळच्या टप्प्यात विद्यार्थ्यांना शहर बसस्थानकातून बसेस मिळत आहेत. मात्र, दुपारी ४ नंतर वेळेवर बस नसल्याने विद्यार्थ्यांना अडचणी येत आहेत.

बसची वाट बघत तासभर थांबावे लागत आहे. विद्यापीठाच्या पुढील महिन्यात इंटर्नल व फेब्रुवारीत लेखी परीक्षा होण्याची शक्‍यता आहे. सकाळी १० वाजता या परीक्षा असतात. त्यामुळे बस चुकल्यास विद्यार्थ्यांना परीक्षेला मुकावे लागेल. यामुळे बससेवा सुरळीत सुरु करावी, अशी मागणी होत आहे.

हेही वाचा - सरपंचाच्या शिक्षणानं अनेकांचा हिरमोड -

लांबपल्ल्याच्या बसमध्ये अडवणूक

मध्यवर्ती बसस्थानकातून निपाणी, कोल्हापूर, पुणे आदी भागातील बससेवा विद्यापीठाजवळून जातात. मात्र, या बसेसमध्ये पास असलेल्या विद्यार्थ्यांना प्रवेश दिला जात नाही. या बसेसमध्ये पासधारक विद्यार्थ्यांना प्रवेश दिल्यास सोयीस्कर होणार आहे. याचा परिवहन महामंडळाने विचार करावा, अशी मागणीही विद्यार्थ्यांतून केली जात आहे.

संपादन - स्नेहल कदम