सार्वजनिक ठिकाणी क्रिकेट खेळल्याने नऊ जणांवर गुन्हा

वाई : कोरोनाचा संसर्ग व प्रादुर्भाव रोखण्यासाठी जिल्हाधिकाऱ्यांनी लागू केलेल्या संचारबंदी आदेशाचे उल्लंघन करून सार्वजनिक ठिकाणी क्रिकेट खेळल्याबद्दल मुगाव (ता. वाई) येथील नऊ जणांवर आज पोलिस ठाण्यात गुन्हा दाखल करण्यात आला. 
संजय किसन चिरगुटे, नामदेव धोंडिराम महांगरे, रोहित रामचंद्र कुंभार, आकाश अंकुश दौंड, ओम राजेंद्र रावडे, प्रसाद विश्वास महांगरे, अक्षय मनोहर शिंदे, अजित मोहर शिंदे, विकास तुकाराम रावडे अशी गुन्हा दाखल झालेल्यांची नावे आहेत.
 
सर्व जण मंगळवारी (ता. 14) मुगाव येथे धोम जलाशयालगत क्रिकेट खेळताना आढळून आले. त्यांचे हे कृत्य कोरोना विषाणू संसर्गाच्या पार्श्‍वभूमीवर इतरांच्या जीवितास धोका होऊ शकतो, याची जाणीव असताना केलेले आहे. त्यांनी व्यक्तिगत सुरक्षा धोक्‍यात येईल व संसर्ग पसरविण्याची घातक कृती करून कोरोना विषाणू संसर्ग व प्रादुर्भाव रोखण्यासाठी जिल्हाधिकाऱ्यांच्या आदेशाचा भंग केल्याची फिर्याद पोलिस पाटील लक्ष्मण मोझर यांनी दिली. त्यानुसार त्यांच्या विरोधात वाई पोलिस ठाण्यात गुन्हा दाखल करण्यात आल्याची माहिती पोलिस निरीक्षक आनंदराव खोबरे यांनी दिली. 

कोरेगाव : कोरोना विषाणूचा संसर्ग रोखण्यासाठीच्या उपाययोजनेचा भाग म्हणून प्रशासनाने ठरवून दिलेल्या वेळेची मर्यादा ओलांडून शासकीय आदेशाचे उल्लंघन केल्याप्रकरणी त्रिपुटी (ता. कोरेगाव) येथील शिधावाटप दुकान चालकाविरुद्ध पोलिस ठाण्यात गुन्हा दाखल झाला आहे.
 
पोलिसांनी दिलेल्या माहितीनुसार, यासंदर्भात तहसीलदार कार्यालयातील पुरवठा निरीक्षक हणमंत गणपती पवार यांनी फिर्याद दिली आहे. त्यात म्हटले आहे, की कोरोना विषाणूच्या पार्श्वभूमीवर प्रशासनाने जीवनावश्‍यक वस्तूंची दुकाने सुरू ठेवण्यासाठी सकाळी आठ ते 11, अशी वेळ ठरवून दिली आहे.

या पार्श्वभूमीवर प्रांताधिकारी नलावडे, पुरवठा अधिकारी सुनील वसंतराव बोतालजी यांच्यासमवेत गस्त घालत असताना त्रिपुटी (ता. कोरेगाव) येथील शिधावाटप दुकानचालक नलिनी जाधव दुपारी साडेबाराच्या सुमारास धान्य वाटप करताना आढळून आल्या. दुकानासमोर नागरिकांची गर्दी करून कोरोनाचा संसर्ग पसरवण्याची कृती करून त्यांनी शासकीय आदेशाचे उल्लंघन केल्याचे फिर्यादीत नमूद केले आहे. हवालदार बसवंत तपास करत आहेत.


शेतकऱ्यावर रिव्हॉल्व्हर रोखणाऱ्याच्या घरात सापडली 16 जिवंत काडतुसे; संशयित फरार