जिल्हाधिकाऱ्यांनी दिला कन्नड शिकण्याचा सल्ला; मराठी भाषिकातून नाराजी

निपाणी : जिल्हाधिकारी एम. जी. हिरेमठ यांनी हंचिनाळ-केएस येथे ग्रामवास्तव्य उपक्रमांतर्गत आल्यावर त्यांनी शालेय विद्यार्थ्यांसह ग्रामस्थांना कन्नड शिकण्याचा सल्ला दिला. एकीकडे नोकरीसाठी शिक्षण महत्वाचे असल्याचे सांगत त्यांनी कन्नड शिकण्याचा सल्ला दिल्याने जिल्हाधिकारयांच्या वक्तव्याबद्दल ऊलट-सुलट चर्चा सुरु झाली आहे. शिवाय मराठी भाषिकांनी जिल्हाधिकारयांच्या वक्तव्याबद्दल नाराजी व्यक्त केली आहे. (Collector M.G.Hiremath)

शनिवारी हंचिनाळ येथे ग्रामवास्तव्य उपक्रमांतर्गत जिल्हाधिकारी हिरेमठ यांनी गावातील ग्रामस्थांच्या समस्या जाणून घेतल्या. शिवाय अंगणवाडी, मराठी व कन्नड शाळांना भेट देऊन त्यांनी विद्यार्थ्यांशी संवाद साधला. निपाणी तालुक्यात मराठी भाषिकांची संख्या मोठी आहे. शिवाय ग्रामवास्तव्य कार्यक्रम होणारया आणि महाराष्ट्राच्या सीमेवर असणारया हंचिनाळ गावातही मराठी भाषिक बहुसंख्य आहेत. दरम्यान ग्रामस्थ आणि विद्यार्थ्यांच्या भेटीवेळी जिल्हाधिकारी हिरेमठ यांनी सर्वांना कन्नड शिकण्याचा सल्ला दिला.

याबद्दल प्रा. डाॅ. अच्युत माने म्हणाले, निपाणी भागात मराठी व कन्नड भाषिक लोक सौहार्दतेने नांदत आहेत. शिवाय प्रत्येकांनी आपल्या भागाचा, भाषेचा विषय आणि अस्मिता शाबूत ठेवून व्यवहार चालविला आहे. एका जबाबदार अधिकारयाने अभिनिवेष बाळगणे हे गैर आहे. कोणत्या भाषेत शिकायचे हा ज्याचा-त्याचा मुलभूत हक्क आहे.