सांगली : कुरुंदवाडीत वाळू उपसा करताना जेसीबी, ट्रॅक्टर पकडला; तहसीलदारांची धाड

झरे (सांगली) : कुरुंदवाडी (ता. आटपाडी) येथे वाळू उपसा करीत असल्याची माहिती तहसीलदार सचिन मुळीक यांना मिळाली. अशी माहिती मिळताच तात्काळ तहसीलदार व त्यांच्या टीमने परिसरातील ओढापात्रात धाड टाकली. त्यामध्ये जेसीबीच्या साह्याने ट्रॅक्टरमध्ये वाळू भरीत असताना ट्रॅक्टर व जेसीबीला जागेवरच पकडले आहे. अनेक दिवसांपासून या परिसरात दिवसाढवळ्या वाळू उपसा सुरू आहे. यावरून अनेक वेळा तक्रारी झाल्या आहेत. मात्र या प्रकरणात एकमेकांना बघून घेण्याची भाषा बोलली जात आहे.

हेही वाचा - आरोग्य यंत्रणेने पुन्हा मिशन मोडवर यावे; सांगली जिल्हाधिकाऱ्यांचे आदेश

वाळू उपसामुळे ओढा पात्रात अनेक मोठ खड्डे पडले आहेत. संपूर्ण पात्रातील वाळू उपसा केल्याने बदल झाला आहे. सततच्या वाळू उपसामुळे पडणाऱ्या पावसाचे पाणी ओढापात्रात थांबत नाही. परिणामी दुष्काळाला सामोरे जावे लागते. परंतू आज तहसीलदार सचिन मुळीक यांना वाळू उपसा होत असलेली माहिती मिळताच त्यांनी महसूल विभागाच्या टीमसह तिथे धाड टाकली. यामध्ये जेसीबी व ट्रॅक्टर सापडला आहे. धाड टाकत असताना नायब तहसीलदार राजकुमार राठोड, तलाठी रविंद्र कांबळे, कोतवाल संजय माने उपस्थित होते.