बेळगाव : सरकारी जमीन विक्रीची चौकशी सुरु

बेळगाव : रायबागला सरकारी जमीनीची विक्री झाल्याची धक्कादायक माहिती पुढे आली आहे. वरिष्ठ अधिकारीस्तरावर १ आठवड्यापासून चौकशी सुरु असून, संबंधीत अधिकाऱ्यांवर फौजदारी गुन्हे नोंदविण्यासाठी हालचाली वाढल्या आहेत. रायबागला मत्स्य विभागाची १ एकर २० गुंठे जमीन आहे. पैकी ६५ बाय ७० चौरस फूट जागा बनावट कागदपत्रे तयार करून चव्हाण नावाच्या व्यक्तीच्या नावे हस्तांतरित केली आहेत. यानंतर चव्हाण यांनी सदर जमीन चौघांना विकली आहे. यामुळे खळबळ उडाली असून, अधिकाऱ्यांच्या रडावर रायबाग मुख्य कार्यकारी अधिकारी, बिल कलेक्टर आणि नोंदणी विभागातील कर्मचाऱ्याचा सहभाग आहे, अशी माहिती पुढे आली आहे.

यामुळे या प्ररकरणांत त्यांना ‘कारणे दाखवा’ नोटीस जारी झाली आहे. दाखल्यांची पडताळणी केली जात आहे. त्यासाठी जिल्हा नगरविकास अधिकारी ईश्‍वर उळागड्डी यांनी जिल्हाधिकारी व नगरविकास खात्याला पत्र पाठविले आहे. त्यामुळे लवकरच कारवाई होण्याची व तिघांवर निलंबनाची शक्यता वर्तवली जात आहे.

माहिती हक्क कार्यकर्ते सुरेंद्र उगारे यांनी माहिती उघडकीस आणली आहे. प्रादेशिक आयुक्त, जिल्हा नगरविकास अधिकाऱ्यांकडे गेल्या २ वर्षापासून पाठपुरावा करत आहेत. पण, त्याची सुरवातीला गंभीर दखल घेतली नाही. अलिकडे वरिष्ठ पातळीवर चौकशी केली जात असून, कारवाईबाबत पत्रव्यवहार सुरु आहे. याबाबत ॲड. उगारे यांच्याकडे चौकशी केली असता त्यांनी ‘‘प्रकरणाची पाळेमुळे खणून काढणे जरुरी आहे. सर्व व्यवहार पाठीमागे नेते, वरिष्ठ अधिकारी आहेत. यामुळे एसीबीकडे चौकशी सोपवली जावी.’’

‘‘रायबाग नगर पंचायतीचे मुख्याधिकारी, बिल कलेक्टर, सहाय्यक अधिकाऱ्यांनी मिळून मत्स्य विभागाची सरकारी जमीनीची विक्री केल्याचे प्राथमिक चौकशीत पुढे आले आहे. यामुळे त्यांना ‘कारणे दाखवा’ नोटीस आणि शासनाला अहवाल अहवाल पाठविला आहे.’’

- ईश्‍वर उळागड्डी जिल्हा नगरविकास अधिकारी

काय घडले आहे?

रायबागला बसस्थानकाजवळ (चित्रपटगृहाजवळ) १ एकर २० गुंठे जमीन मत्स विभागाची आहे. जमीनीची अधिकारी व निर्वाचीत सदस्यांनी मिळून परस्पर विक्री केल्याचे आढळून आले आहे. फेब्रुवारी २०१८ मध्ये प्रकरण घडले. पण, अलिकडे माहिती उघडकीस आली आहे. ज्या व्यक्तीच्या नावे जागा हस्तांतरीत केली होती. त्याने चौघांना जागा विक्री विकली आहे. सर्वांच्या विरोधात आता फौजदारी गुन्हे नोंदविण्याच्या हालचाली सुरु झाल्या आहेत.

अलिकडे केडीपी बैठक झाली. त्या बैठकीत विषय आला. पालकमंत्री गोविंद करजोळ यांनी रायबाग नगरपंचायत मुख्याधिकारीसह इतरांवर शिस्तभंग आणि फौजदारी गुन्ह्याबाबत निर्देश बजाविले आहेत.