जत तालुक्‍यातील शेतमजूर बिऱ्हाडांसह कारखान्यांकडे रवाना 

संख : जत तालुक्‍यातील पूर्व भागातील शेतमजूर मोठ्या संख्येने जिल्ह्यासह परजिल्ह्यात ऊस तोडणीसाठी बिऱ्हाडांसह रवाना होत आहेत. नवीन गळीत हंगाम सुरळीत सुरू होत असले तरी, कोरोनापासून दक्षता घेण्याची गरज आहे. कोरोनामुळे ऊस तोड मजूर व कारखानदारही चिंतेत आहेत. ऊसतोड मजुरांना शेतावर आणणे कारखानदारांसमोर आव्हान आहे. 

अधिक मासामुळे दिवाळीपूर्वीच जत तालुक्‍याच्या पूर्व भागातील ऊस तोड मजूर रवाना होत आहेत. त्यांची दिवाळी उसाच्या फडातच साजरी होणार आहे. पूर्व भागातील लहान लहान गावे ओस पडू लागल्याचे चित्र आहेत. बाजारपेठेवरही मोठा परिणाम होत आहे. गेल्यावर्षीपेक्षा यंदा पंधरा दिवस अगोदर टोळ्या रवाना होत आहेत. चार पाच दिवसांपासून ऊसतोड मुकादम मजुरांना सांगली, रेठरे, साखराळे, कोल्हापूर, उस्मानाबाद व लगतच्या कर्नाटकात ऊस तोडीसाठी मजुरांना ट्रॅक्‍टर, ट्रकमधून बायका, मुले, जनावरे घेऊन निघाल्याचे रस्त्यावर रोज पाहण्यास मिळत आहे. 

प्रत्येक मुकादमकडे 20 ते 25 मजूर(कोयता) असतात. प्रत्येक कोयत्यास 80 हजार ते सव्वा लाखापर्यंत आगाऊ रक्कम ऊसतोडीच्या कामासाठी दिली जाते. सहा महिने, ऊस तोड केली, की काही मजुरांची रक्कम फिटते. तर काहींची रक्कम राहते. उर्वरित रक्कम दुसऱ्या वर्षी फेड केली जाते. 

मजुरांचा तुटवडा 
जत पूर्व भागातील मजूर ऊस तोडीसाठी कोल्हापूर, सातारा, सोलापूर, उस्मानाबाद व लगतच्या कर्नाटकात रवाना होत असल्याने ऊस, डाळिंब, द्राक्ष शेतकऱ्यांना मजुरांची तुटवडा भासणार आहे. दुष्काळामुळे ऊस तोडीसाठी जाणे मजुरांच्या पाचवीलाच पुजले आहे. यावर्षीही पावसामुळे काही बदल झालेला नाही.

संपादन : प्रफुल्ल सुतार