कुपवाडला केमिकलच्या स्फोटात कामगाराचा मृत्यू

कुपवाड : औद्योगिक वसाहतीतील कंपनीत केमिकल लिक्विड बॅरेलच्या स्फोटात जखमी एका कामगाराचा मृत्यू झाल्याची घटना घडली. राहुल बाजीराव नंदिवाले (वय 25 रा.सुभाषनगर मिरज) असे मयत झालेल्या कामगाराचे नाव आहे. याबाबतची नोंद कुपवाड औद्योगिक पोलिस ठाण्यात करण्यात आली आहे.

पोलिसांनी दिलेली माहिती अशी की, मयत राहुल नंदीवाले हा युवक कुपवाड औद्योगिक वसाहतीतील सुयश कास्टिंग प्रा.ली या कंपनीत वेल्डर म्हणून काम करत होता. बुधवारी कंपनीत काम करत असताना तेथे असणाऱ्या एका केमिकल लिक्विड बॅरेलचा स्पोफ्ट झाला. दुर्घटनेत राहुल हा जखमी झाला. त्याचे शरीर नव्वद टक्के भाजले. याचवेळी याचवेळी कंपनीचे इंचार्ज निखिल सुतार यांनी राहुल यास उपचारासाठी शासकीय रुग्णालयात दाखल केले. उपचारा दरम्यान गुरुवारी त्याचा मृत्यू झाला. घटनेची नोंद कुपवाड पोलिसांत झाली आहे. अधिक तपास हवालदार एकनाथ करांडे करीत आहेत.