सातारा जिल्ह्यातील कोरोना संशयित रुग्णांच्या तपासणीसाठी पाच ठिकाणी केअर सेंटरची स्थापना

सातारा : राज्यात रुग्ण मोठ्या प्रमाणावर आढळून येत असून, जिल्ह्यातही काही दिवसांपासून संशयित रुग्ण आढळून येण्यास सुरुवात झाली आहे. त्यावरील उपाययोजना म्हणून जिल्हाधिकारी शेखर सिंह व मुख्य कार्यकारी अधिकारी संजय भागवत यांच्या मार्गदर्शनाखाली जिल्ह्यात पाच ठिकाणी कोरोना केअर सेंटर सुरू करण्यात आले आहेत.
 
जिल्ह्यात कोरोना केअर सेंटरची स्थापना करण्यात आली असून, या सेंटरमध्ये संशयित कोरोना रुग्णांची तपासणी करण्यात येणार आहे. सध्या जिल्ह्यातील सर्व गावांत रुग्णांची माहिती घेण्यात येत आहे. या रुग्णांमध्ये आयएलआय (सर्दी, ताप, खोकला सदृश्‍य लक्षणे) व सारी (तीव्र सर्दी, ताप, खोकला असणारे रुग्ण ज्यांना दवाखान्यात दाखल करण्याची आवश्‍यकता आहे) याबाबत रुग्णांची माहिती घेण्यात येत आहे. यातील ज्या रुग्णांमध्ये सारीची लक्षणे आढळून आली आहेत. अशा रुग्णांच्या कोरोनाच्या तपासणीकरिता कोरोना केअर सेंटर स्थापना करण्यात आली आहेत. येथे अशा रुग्णांची तपासणी होणार आहे. याकरिता सामान्य रुग्णालय सातारा (सातारा व जावळी), उपजिल्हा रुग्णालय कऱ्हाड (कऱ्हाड व पाटण), ग्रामीण रुग्णालय वाई (वाई, खंडाळा व महाबळेश्वर), ग्रामीण रुग्णालय कोरेगाव (कोरेगाव व खटाव) व उपजिल्हा रुग्णालय फलटण (फलटण, माण) येथे कोरोना केअर सेंटर आहेत. या ठिकाणी संबंधित रुग्णांच्या घाशातील स्त्रावांचे नमुने घेऊन तपासणीसाठी पुढे पाठविले जाणार आहेत.
 
कोरोना संसर्गाचे गांभीर्य ओळखून होम क्वारंटाइनमध्ये राहावे, तसेच सर्दी, ताप, खोकला झाल्यास त्वरित आरोग्य विभागाशी संपर्क करून आरोग्य तपासणी करून घ्यावी. जेणेकरून त्यावर त्वरित उपचार करण्यात येईल, असे मुख्य कार्यकारी संजय भागवत यांनी सांगितले. 

Lockdown : डॉक्‍टर... पेट्रोलसाठी औषधांची चिठ्ठी द्या..!

श्री ब्रह्मचैतन्य महाराज संस्थानचे अखंड मदत कार्य सुरुच; ससूनला पंचवीस लाखांचा निधी
 

साहित्याची कमतरता नाही 

जिल्ह्यातील सर्व आरोग्य संस्थांना, रुग्ण तपासणीकरिता डॉक्‍टरांना फेस शिल्ड, पीपीई किट, एन 95 मास्क, ट्रिपल लेअर मास्क व सॅनिटायझर पुरेशा प्रमाणात वाटप केले आहे. या साहित्यांची जिल्ह्यात कमतरता होणार नाही, याची जिल्हाधिकारी शेखर सिंह, मुख्य कार्यकारी अधिकारी भागवत यांच्या मार्गदर्शनाखाली दक्षता घेण्यात येत आहे, असे जिल्हा आरोग्य अधिकारी डॉ. अनिरुद्ध आठल्ये यांनी सांगितले.