सोलापूरात रिलायन्स कॅन्सर हॅास्पिटलचे उद्धाटन

सोलापूर : रिलायन्स कॅन्सर हॅास्पिटलमुळे सोलापुरात अत्याधुनिक उपचाराची सुविधा उपलब्ध झाली आहे, असे खासदार डॅा. जयसिद्धेश्वर
महास्वामी यांनी सांगितले. 

अक्कलकोट रस्त्यावर उभारण्यात आलेल्या या हॅास्पिटलचे उदघाटन डॅा. जयसिद्धेश्वर महास्वामी यांच्या हस्ते झाले. त्यावेळी ते बोलत होते. महापौर शोभा बनशेट्टी, कार्यकारी संचालक व मुख्य कार्यकारी अधिकारी डाॅ. संतोष शेट्टी, रिलायन्स हॅास्पिटल्सच्या रेडिएशन अॅान्कालॅाजी विभागाचे राष्ट्रीय प्रमुख डॅा. कौस्तुभ तालपात्रा व मोहन डांगरे व्यासपीठावर होते. मुंबईतील पावसामुळे उदघाटक महसूलमंत्री चंद्रकांत पाटील आणि हॅास्पिटलच्या अध्यक्षा टिना अंबानी कार्यक्रमास येऊ शकल्या नाहीत.

डॅा. जयसिद्धेश्वर महास्वामी म्हणाले, या ठिकाणी अत्याधुनिक सुविधा, तंत्रज्ञान व कुशल मनुष्यबळ आहे. त्यामुळे कॅन्सरवर तातडीने उपचार होण्यासाठीची सुविधा या ठिकाणी उपलब्ध झाली आहे. या हॅास्पिटलसाठी टिना अंबानी यांनी सोलापूरची निवड केली त्याबद्दल त्यांना धन्यवाद. देशात कॅन्सरवरील सर्वसमावेशक उपचाराची केंद्र फार कमी आहेत, त्यात रिलायन्स हॅास्पिटलची भर पडली आहे.

शेट्टी म्हणाले, देशात कर्करोगाचे प्रमाण वाढत आहे. आपल्यासारख्या विकसनशील देशात मृत्यूचे कारण हे कर्करोग असण्याचे कारण वाढत चालले आहे. गेल्या 26 वर्षांत हे प्रमाण दुप्पट झाले आहे. ही कॅन्सर उपचार केंद्रे महात्मा ज्योतिबा फुले जनआरोग्य योजनेच्या पॅनलवर असून या योजनेच्या लाभार्थ्यांनाही या ठिकाणी उपचाराचा लाभ घेता येणार आहे. यावेळी महापौर शोभा बनशेट्टी यांनीही मनोगत व्यक्त केले.