कारागृहात बंदिवानाचा पोलिसावर चाकूहल्ला

नगर : शहरातील मध्यवर्ती कारागृहात (सबजेल) रविवारी पहाटे पळून जाण्यासाठी एका बंदिवानाने बंदोबस्तासाठी असलेल्या महिला पोलिस कर्मचाऱ्यावर स्वयंपाकगृहातील चाकू घेऊन हल्ला केला. त्यात ही कर्मचारी जखमी झाली आहे. याबाबत कोतवाली पोलिस ठाण्यात गुन्हा दाखल करण्यात आला आहे. 

पावलस कचरू गायकवाड, असे बंदिवान आरोपीचे नाव आहे, तर कारागृह पोलिस सुरक्षा कर्मचारी सुजाता निवृत्ती शेळके ऊर्फ सुजाता गोपाळ हाडवळे, असे जखमी महिला कर्मचाऱ्याचे नाव आहे. 

हेही वाचा ः रांधेच्या वेशीवर सापडलेली वीरगळ

अधिक माहिती अशी ः मध्यवर्ती कारागृहातील कर्मचारी सुजाता शेळके यांची बंदोबस्तासाठी नेमणूक करण्यात आली होती. त्या कर्तव्य बजावीत असताना आज (रविवारी) पहाटे आरोपी पावलस गायकवाड हा स्वयंपाकगृहातील चाकू घेऊन आला. पळून जाण्याच्या उद्देशाने त्याने सुजाता शेळके यांच्या डोक्‍यावर चाकूने वार केला. शेळके यांनी तो डाव्या हातावर झेलला; परंतु हाताला मोठी जखम झाल्याने त्या खाली पडल्या. त्यामुळे आरोपी पावलस गायकवाड हातात चाकू घेऊन कारागृहाच्या मुख्य प्रवेशद्वाराकडे गेला. दरम्यान, जखमी सुजाता शेळके यांनी सायरन वाजविल्याने अन्य कर्मचारी तातडीने मुख्य प्रवेशद्वाराकडे धावले. त्यांनी आरोपी पावलस गायकवाडला ताब्यात घेतले, असे कोतवाली पोलिस ठाण्यात दिलेल्या फिर्यादीत म्हटले आहे. 

हेही वाचा ः नाताळगाणी वाढवितात ख्रिसमसचा उत्साह

दरम्यान, घटनेची माहिती मिळाल्यानंतर पोलिस उपअधीक्षक संदीप मिटके, निरीक्षक विकास वाघ यांनी पोलिस पथकासह घटनास्थळी धाव घेतली. या प्रकरणी आरोपीविरुद्ध खुनाचा प्रयत्न, सरकारी कामात अडथळा आणि कारागृहातील शिस्तीचा भंग केल्याचा आरोपावरून कोतवाली पोलिस ठाण्यात गुन्हा दाखल करण्यात आला. 

न्यायालयीन कोठडीतील बंदिवान 
पावलस गायकवाड हा पारनेर पोलिस ठाण्यातील दाखल असलेल्या, खुनाचा प्रयत्न केल्याच्या गुन्ह्यातील आरोपी आहे. त्याला न्यायालयीन कोठडीत ठेवण्याचा आदेश आहे. त्यानुसार गायकवाड याला जिल्हा मध्यवर्ती कारागृहात ठेवण्यात आले होते. कारागृहातून पळून जाण्यासाठी त्याने चाकूहल्ला केल्याची माहिती पोलिस सूत्रांकडून मिळाली. 

न्यायालयाच्या परवानगीने कारवाई 
आरोपी बंदिवान असल्याने त्याला लगेच अटक करता येत नाही. न्यायालयाच्या परवानगीने आरोपीला गुन्ह्याच्या तपासाकामी ताब्यात घेण्यात येईल. 
- संदीप मिटके पोलिस उपअधीक्षक, शहर