Kolhapur News : मलकापुरात मद्यधुंद पर्यटकांची हुल्लडबाजी; ट्रकचालकाला विनाकारण मारहाण

मलकापूर : तालुक्यात पावसाळी पर्यटनासाठी आलेल्या मद्यधुंद तरुणांनी आज येथील मंगळवार पेठेत ट्रकचालकाला विनाकारण मारहाण केल्याने मोठा तणाव निर्माण झाला. स्थानिक नागरिकांनी परिस्थिती पाहून वातावरणातील तणाव निवळला.

दरम्यान, येथे पोलिस चौकी असताना पोलिस प्रशासन नेमके असते कोठे? अशा संतप्त प्रतिक्रिया स्थानिक नागरिकांनी व्यक्त केल्या. पावसाळा सुरू झाल्याने अनेक पर्यटक तालुक्यातील बर्की, केर्ली, मानोली, पालेश्वर, आंबा या ठिकाणी पावसाळी पर्यटनासाठी येत आहेत.

मात्र दुचाकीवरून येणाऱ्या तरुण पर्यटकांची मद्यधुंद अवस्थेतील पर्यटनवारी स्थानिक नागरिक व छोट्या व्यापाऱ्यांना अधिक त्रासदायक ठरू लागली आहे. मुख्य रस्त्याबरोबरच वर्दळीच्या ठिकाणी मद्यधुंद अवस्थेतील पर्यटक वाहनधारकांना त्रास देत आहेत. त्यामुळे ठिकठिकाणी वादावादीचे प्रसंग उद्‌भवत आहेत.

आज सायंकाळी येथील मंगळवार पेठेत मद्यधुंद अवस्थेतील दुचाकीस्वारांनी ट्रक चालकाला विनाकारण मारहाण केली. याचे पडसाद बाजारपेठेत उमटले. वादावादीमुळे वाहतूक कोंडी झाली. मार्गावर वाहनांच्या रांगा झाल्या. नागरिकांच्या सर्तकतेमुळे मद्यधुंद दुचाकीस्वारांनी परिस्थिती पाहून पलायन केल्याने पुढील अनर्थ टळला.

दरम्यान, पोलिस प्रशासनाने शाळी नाका प्रवेशद्वारावरच अशा हुल्लडबाजांना आवर घालून आबालवृद्ध व महिलांना होणारा नाहक त्रास थांबवावा, अशी मागणी स्थानिक नागरिकांतून होत आहे.