Maratha Reservation : '..तर मराठा समाज सरकारला धूळ चारेल'; इशारा देत मराठा बांधवांचा जरांगेंच्या उपोषणाला पाठिंबा

कोल्हापूर : शासनातील सदस्यांनी मनोज जरांगे-पाटील व मराठा समाजासंदर्भात बेताल वक्तव्ये करू नयेत, असा इशारा सकल मराठा समाजाने येथे दिला. जरांगे-पाटील (Manoj Jarange-Patil) यांनी अंतरवाली सराटी येथे सुरू केलेल्या उपोषणास समाजाने पाठिंबा दिला. तसेच, मराठा आरक्षणाचा (Maratha Reservation) प्रश्‍न मार्गी न लावल्यास मराठा समाज एकत्रितपणे शासनाला धूळ चारेल, असा इशारा दिला. नर्सरी बागेतील राजर्षी छत्रपती शाहू समाधी स्मारक परिसरात मराठा बांधव जमले होते.

जरांगे-पाटील यांनी चौथ्या टप्प्यातील उपोषण सुरू केले आहे. त्यास पाठिंबा देण्याकरिता मराठा बांधव शाहू समाधी स्मारक परिसरात एकत्र आले. यावेळी चाळीस वर्षांपेक्षा जास्त काळ मराठा समाज आरक्षणापासून वंचित असून, त्यास सत्तेच्या वळचणीस असलेले मराठा राज्यकर्ते कारणीभूत आहेत. छत्रपती शिवाजी महाराज यांची शपथ घेऊन मुख्यमंत्री एकनाथ शिंदे यांनी जरांगे-पाटील यांना शब्द दिला होता. तो सोयीस्कररित्या मोडला आहे.

मागील लोकसभेत उच्चांकी बहुमत असतानाही देशातील विधानसभेत महिलांसाठी ३३ टक्के आरक्षण कायदा त्यांनी पारित केलेला नाही. महाराष्ट्रातील विधानसभा निवडणुकीपूर्वी महाराष्ट्र विधानसभेच्या जागेपैकी ३३ टक्के जागा महिलांसाठी आरक्षित ठेवाव्यात. अन्यथा मराठा आरक्षणासोबत या आरक्षणाची लढाईही महाराष्ट्रात सुरू होईल, असा इशारा दिला.

विजय देवणे, अॅड. बाबा इंदुलकर, अॅड. चारुशिला चव्हाण, सुनीता पाटील, अनिल घाटगे यांनी मनोगत व्यक्त केले. बाबा पार्टे, आर. के. पोवार, अॅड. निशिकांत पाटोळे, अॅड. सतीश नलवडे, अॅड. चंद्रकांत कुरणे, अनिल घाटगे, सुभाष जाधव, प्रा. आनंदराव पाटील, बाबा महाडिक, रुपेश पाटील, सचिन चव्हाण आदी उपस्थित होते.