Prakash Awade : 'पोलिस ठाण्यात गुंडांना सौजन्याने खुर्ची मिळते'; आमदार आवाडेंनी अधीक्षकांसमोरच काढले वाभाडे

इचलकरंजी : ‘शहरात औद्योगिक शांतता बिघडली असून ती जपण्यासाठी पोलिसांचे पाठबळ कमी पडत आहे. वाढलेल्या गुंडगिरीबाबत विधानसभेत आवाज उठवला आहे. गुंडांच्या याद्याही दिल्या आहेत. त्या मिळाल्या नसल्या तर पुन्हा पुन्हा याद्या देतो. पोलिस ठाण्यात सर्वसामान्य नागरिकांना नीट वागणूक मिळत नाही. मात्र, गुंडांना सौजन्याने खुर्ची मिळते, ’ अशी घणाघाती टीका आमदार प्रकाश आवाडे यांनी जिल्हा पोलिस अधीक्षक महेंद्र पंडित (Mahendra Pandit) यांच्यासमोरच केली.

गणेशोत्सव व ईद-ए-मिलाद सणाच्या पार्श्वभूमीवर शांतता बैठकीचे आयोजन करण्यात आले होते. या बैठकीत सुरुवातीपासून सर्वसामान्य नागरिकांपासून विविध राजकीय पक्ष, संघटनांच्या पदाधिकाऱ्यांपर्यंत सर्वांनीच इचलकरंजीतील वाढत्या गुन्हेगारीवर बोट ठेवले. त्यामुळे ही बैठक गणेशोत्सवाच्या पार्श्वभूमीवर असली तरी चर्चा शहरातील गुन्हेगारीवर झाली.

आमदार आवाडे (MLA Prakash Awade) म्हणाले, ‘कोल्हापुरातील पोलिसांकडून इचलकरंजी शहरात येऊन सातत्याने कारवाई केली जाते. एकाच क्लबवर तीन तीन वेळा कारवाई होते. मात्र स्थानिक पोलिस शांतच आहेत. शहराच्यादृष्टीने ही मोठी खंत आहे. यामुळे शहरात गुंडगिरी वाढत असून शहर शांत ठेवण्याची जबाबदारी पोलिसांवर आहे. आता पोलिसांनी अंतर्मुख होऊन विचार करावा. सर्वसामान्य नागरिकांना काही त्रास होत असेल तर तक्रार करा. तक्रार कोणी घेत नसतील तर माझ्याकडे या. मी कोणाला सोडणार नाही.’

यानंतर गुन्हेगारीच्या सर्व मुद्द्यांना दुजोरा देत बोलताना पोलिस अधीक्षक पंडित म्हणाले,‘गांजा, चरसचे प्रमाण वाढले आहे. याची साखळी तोडून काढण्यासाठी पोलिस दलाला सूचना दिल्या आहेत. शहरातील गुंडांवर तीन तीनवेळा मोका कारवाई करूनही ते गंभीर गुन्हे करत आहेत. यापुढे शास्त्रोक्त तपास करून अशा समाजकंटकांची जागा कायमस्वरूपी जेलमध्येच ठेवली जाईल.’

साहेब ..गांजा, चरस रोखा

इचलकरंजी शहरात गांजा, चरसबाबत सुरू असणारी चर्चा आज जिल्हा पोलिस अधीक्षकांपुढेही उमटली. गांजा कुठून येतो, कसा पुरवठा होतो, यासह लोकेशनबाबत माहिती आम्ही देत असतो. या व्यसनाच्या आहारी तरुणाई मोठ्या प्रमाणात जात असून साहेब, शहरात येणारा गांजा, चरस रोखा, अशी मागणी अनेक सामाजिक संघटना, राजकीय पक्षांच्या पदाधिकाऱ्यांनी केली.