...त्यासाठी कबनूर नगरपरिषद होणे आवश्‍यक

कबनूर : इचलकरंजी या वस्त्रनगरीच्या परिणामाने कबनूरचे औद्योगीकरण मोठ्या प्रमाणात झाले. साहजिकच कबनूरची लोकवस्ती प्रचंड प्रमाणात वाढली. कबनूरची लोकवस्ती इतकी वाढली की कबनूरलगत असणारी गावे शहापूर, तारदाळ, कोरोची, तिळवणी, रुई, चंदूर, इचलकरंजी या गावांच्या सीमेपर्यंत कबनूरची लोकवस्ती झाली. त्यामुळे या गावांची लोकवस्ती कोठे संपते व इतर गावांची कुठे सुरू होते. कबनूरमधील चंदूर रस्ता भागाकडील औद्योगीकरण इतक्‍या मोठ्या प्रमाणात झाले आहे की ते एक स्वतंत्र औद्योगिक वसाहतच वाटते. 

हे पण वाचा -  या शेतकऱ्यांसारखा प्रयोग कराल तर व्हाल मालामाल....

कबनूरचा वाढत्या लोकवस्तीमुळे नागरी सुविधांवर मोठा परिणाम झाला आहे. अनेक मूलभूत सुविधा देण्यामध्ये ग्रामपंचायतीला मर्यादा पडताहेत. साहजिकच नागरिकांना मूलभूत सुविधांचे अनेक प्रश्न भेडसावत आहेत. प्रामुख्याने पिण्याच्या पाण्याचा प्रश्न गंभीर बनत आहे. स्वच्छ व मुबलक पाणी मिळणे अशक्‍य झाले आहे. वाढत्या लोकवस्तीमुळे पाणीपुरवठा योजना कुचकामी ठरली आहे. पाच ते सहा दिवसांतून एकदा पाणीपुरवठा केला जातो. त्यातही पाणीपुरवठा योजनेवरील विद्युत पंप नादुरूस्त झाला तर 10 ते 12 दिवसांनी पाणी येते. त्यामुळे नागरिकांची पाण्यासाठी ससेहोलपट होते. 

हे पण वाचा - ...त्यामुळे झाला ‘सायलेंट किलर’पत्नीचा पर्दाफाश 

वाढत्या लोकवस्तीमुळे गावातील स्वच्छतेचा प्रश्न आहे. गावात कचऱ्याचे ढीग, तुंबलेल्या गटारी यामुळे नागरिकांच्या आरोग्याचा प्रश्न निर्माण होतो. साथीच्या रोगाचा कबनूरमधील नागरिकांना फटका बसतो. एवढ्या मोठ्या लोकसंख्येच्या कबनूरमध्ये फक्त एकच आरोग्य उपकेंद्र आहे. हे उपकेंद्र म्हणजे असून अडचण नसून खोळंबा अशी अवस्था आहे. येथे शासकीय रुग्णालयाची आवश्‍यकता आहे. नगरपरिषदेशिवाय शासकीय रुग्णालय होणे अशक्‍य आहे. एकूणच अनेक सुविधांसाठी कबनूर नगरपरिषद होणे आवश्‍यक झाले आहे.