भिवशी येथील आॅनलाईन `वक्तृत्त्व`साठी ११ जिल्हय़ातून स्पर्धक...

सौंदलगा - कोरोनाबाबत जनजागृती करण्याच्या उद्देशाने निपाणी तालुक्यातील भिवशी येथील एस. ग्रुपतर्फे 'कोरोनापासून देशाला कसे वाचवता येईल...' या विषयावर ऑनलाईन (व्हाट्सअॅप) स्पर्धा घेण्यात आली. त्यात ११ जिल्हय़ातून तब्बल ५४ स्पर्धकांनी सहभाग घेतला. मंगळवारी (ता. १४) स्पर्धेचा निकाल घोषित होणार आहे.
लक्ष्मीकांत पाटील, संजय मगदूम, विशाल पाटील, दिग्विजय वारके यांच्या कल्पकतेतून ही स्पर्धा झाली. त्यात बेळगाव, कोल्हापूर, सांगली, पुणे, सोलापूर, नगर, रत्नागिरी, नाशिक, जळगाव, बीड, सिंधूदुर्ग या ११ जिल्हय़ातील स्पर्धकांनी सहभाग घेतला. स्पर्धेत ७ ते ७६ वयापर्यंतच्या ८ पुरुष, ८ महिला, १६ मुले, २२ मुली अशा ५४ जणांनी सहभाग घेतला.

विद्यार्थी ,युवक,युवती,गृहिणी ,नोकरदार,व्यवसायीक,निवृत्त कर्मचारी अशा अनेक क्षेत्रातील कर्नाटक व महाराष्ट्रातील आकरा जिल्ह्यातील 54 स्पर्धक वक्ते सहभागी झाले होते.स्पर्धेचा निकाल जाहीर झाला असून विजेते खालीलप्रमाणे...

• प्रथम - सौरभ पाटील - कोल्हापूर
• द्वितीय - सौ.गीता शअंकलगी - गोकाक
• तृतीय - कुणाल वाघ - पुणे

परीक्षक म्हणून एस. बी. गुरव, प्रथमेश पाटील, रघुनाथ हरदारे यांनी काम पाहिले. विजेत्यांना बक्षीस व सर्व सहभागी स्पर्धकांना प्रमाणपत्र देण्यात आली.

`सकाळ`चा प्रतिसादात वाटा मोठा

कोरोनाच्या पार्श्वभूमीवर आयोजित आॅनलाईन वक्तृत्त्व स्पर्धेचे वृत्त `सकाळ`च्या माध्यमातून जगभरात पोहोचले. त्यामुळे सर्वांपर्यंत ही स्पर्धा गेली. मिळालेल्या या प्रचंड प्रतिसादात `सकाळ`चा वाटा मोठा असल्याचे संयोजक लक्ष्मीकांत पाटील यांनी सांगितले.

कोरोनाबाबत प्रत्येकाने दक्ष राहण्याची गरज आहे. त्यामुळे आज परीक्षणावेळीही परीक्षक व संयोजकांमध्ये स्क्रिन पाहताना `सोशल डिस्टन्सिंग` ठेवले होते. तसेच स्पर्धकांकडून कोरोनाच्या नायनाटासाठी अनेक नवीन उपाययोजना समजल्या.
-संजय मगदूम, संयोजक, भिवशी