पुणे-बंगरुळू हायवेवर भीषण अपघात; ट्रॅक्टरला दुचाकीची जोरदार धडक

उजळाईवाडी : पुणे-बेंगलोर राष्ट्रीय महामार्गावर काल (४) रोजी रात्री ९ च्या दरम्यान पेट्रोलपंपा नजीक कोल्हापूरच्या दिशेने जाणाऱ्या उसाच्या ट्रॅक्टरला दुचाकीस्वाराने पाठीमागून धडक दिल्याने झालेल्या अपघातात दुचाकीवरील दिलीप इंद्रजीत चौहान (वय २१) व मोहितकुमार टुनटुन चौहान (वय २३) (दोघे मुळगाव बाराबंकी उत्तर प्रदेश सध्या रा. गोकुळ शिरगाव ता. करवीर) यांचा मृत्यू झाला. अपघातानंतर ट्रॅक्टर चालक ट्रॅक्टर जागीच सोडून फरार झाला. या अपघाताची नोंद पोलिस गोकुळ शिरगाव पोलिस ठाण्यांत रात्री उशिरा झाली असून अधिक तपास पोलिस कॉन्स्टेबल खोत करीत आहेत.

घटनास्थळावरून मिळालेल्या माहितीनुसार, गोकुळ शिरगाव येथील एका फर्निचर कंपनीत काम करणारे दोन युवक मित्राची दुचाकी गाडी (क्र. एम एच ०९ एफ एफ ९२६५ घेऊन कामानिमित्त कोल्हापूरच्या दिशेने जात होते. यावेळी मयूर पेट्रोल पंपासमोर समोरून कोल्हापूर दिशेने जाणाऱ्या (क्र. एम एच ०९ एफ क्यू ६५५६) या ट्रॅक्टरला जोडलेल्या उसाच्या ट्रॉलीस या दुचाकीस्वाराने पाठीमागून जोराची धडक दिली. ऐन दिवाळीत कष्टकरी चौहान कुटुंबियांवर दुःखाचा डोंगर कोसळल्याने हळहळ व्यक्त करण्यात येत आहे.