‘जयप्रभा’ची जागा हडपण्याचा घाट... कोणी केला आरोप..?

कोल्हापूर - ऐतिहासिक जयप्रभा स्टुडिओवर घाला घालण्याची तयारी महापालिकेत सुरू असल्याचा आरोप नगरसेविका सुरेखा शहा यांनी केला असून, या प्रकरणी वेळप्रसंगी उच्च न्यायालयात जनहित याचिका दाखल करू, पुरातत्त्व विभागाकडे दाद मागू, असेही शहा यांनी म्हटले आहे.

कायदेशीर लढाई लढू

शहा यांनी निवेदनात म्हटले आहे की, जयप्रभा सुटडिओची जागा विभाजनास कॉन्झर्वेशन समितीने मान्यता दिल्याचे नुकतेच मला कळाले आहे. महापालिका प्रशासनही ही परवानगी देण्यासाठी अनुकूल असल्याचे समजते; पण याप्रसंगी आपण कायदेशीर लढाई लढू, असा शहा यांनी इशारा दिला आहे.
ऐतिहासिक जयप्रभा स्टुडिओ हेरिटेजमध्येच आहे, असा न्यायालयाचा निकाल आहे. निकालाची माहिती महापालिकेला असूनही या जागा विभाजनास आणि बांधकामासही परवानगी देण्याचा घाट घातला जात आहे.

वाचा - महान भारत केसरी किताबाने बापाचे हमालीचे ओझं केले हलके... 

छत्रपती शाहू महाराज, छत्रपती राजाराम महाराज  व आक्कासाहेब महाराज यांनी मराठी चित्रपट निर्मितीसाठीच जयप्रभा स्टुडिओ आणि शालिनी स्टुडिओची निर्मिती केली आहे. राजाराम महाराजांनी चित्रतपस्वी भालजी पेंढारकर यांना केवळ चित्रपटनिर्मितीसाठीच या जागेचा वापर व्हावा, यासाठी जागा दिली होती. भालजी पेंढारकरांनी तंतोतंत या अटींचे पालन केले. हा स्टुडिओ कोल्हापूरच्या अस्मितेचा मानबिंदू आहे; पण यावरच घाला घालण्याचा प्रयत्न सुरू असून वेळप्रसंगी याविरोधात आपण न्यायालयात दाद मागू, तसेच पुरातत्त्व विभागाकडेही तक्रार करू, असे शहा यांनी म्हटले आहे.

जयप्रभा स्टुडिओचे जतन आणि संवर्धन करण्याच्या अटीवरच जागा विभाजनास परवानगी देण्याची शिफारस केली जाईल, तशा अटी व शर्ती घातल्या आहेत. जतन आणि संवर्धन कशा प्रकारे करायचे? याचा आराखडाही द्यावा लागेल. अद्याप तसा आराखडा दिलेला नाही. हेरिटेज कॉन्झर्वेशन समितीकडे केवळ हेरिटेजच्या अनुषंगाने येणाऱ्या बाबींचाच अभिप्राय असेल, उर्वरित सर्व निकष महापालिका प्रशासन पाहणार आहे.
- उदय गायकवाड, सदस्य, हेटिरेज कॉन्झर्वेशन समिती