ड्यटी फस्ट

१३३३९
दीड वर्षाच्या कन्येला
सांभाळत बजावली ड्यूटी
पोलिस उपनिरीक्षक चव्हाण यांचे कर्तव्याला प्राधान्य
सकाळ वृत्तसेवा
कोल्हापूर, ता. ७ ः दीड वर्षाच्या मुलीला सांभाळत पोलिस उपनिरीक्षक पल्लवी चव्हाण यांनी आज निवडणुकीच्या बंदोबस्ताचे कर्तव्य बजावले. कर्तव्याला प्राधान्य देणाऱ्या चव्हाण यांच्यावर सोशल मीडियावरून कौतुकाचा वर्षाव सुरू आहे.
पोलिस अधीक्षक कार्यालयातील अनैतिक मानवी वाहतूक प्रतिबंधक कक्षात उपनिरीक्षक पल्लवी चव्हाण कार्यरत आहेत. त्या मूळच्या बांबवडे (ता. शाहूवाडी) येथील आहेत. सध्या त्या कसबा बावडा येथे राहतात. त्यांना दीड वर्षाची मुलगी आहे. निवडणुकीमुळे सभा, रॅली आदीसाठी पोलिसांचा बंदोबस्त तैनात केला जातो. त्यांना शिवाजी पेठेतील सायंकाळी होणाऱ्या सभेच्या ठिकाणी ड्यूटी दिली होती. मुलीने केलेल्या हट्टामुळे तिला घेऊनच त्या कर्तव्यासाठी आल्या. मुलीला एका खुर्चीवर ठेवून तिच्याकडे लक्ष देत त्यांनी बंदोबस्ताचे कर्तव्य पार पाडले. संसाराबरोबर आणि कर्तव्य या दोन्ही जबाबदाऱ्या पोलिस दलातील महिलांना पार पाडाव्या लागतात. संसाराबरोबर कर्तव्याला प्राधान्य देणाऱ्या चव्हाण यांना पाहून उपस्थित महिलांसह नागरिकांनी त्यांचे कौतुक केले. अनेकांनी सोशल मीडियावर त्यांच्यावर कौतुकाचा वर्षाव केला. सबब न सांगता सोपविलेले कर्तव्य पूर्ण करण्याला मी पसंती देते. आज आईबरोबर राहिल्याने मुलगी खूश होती. तिला पाहून मलाही उत्साहाने कर्तव्य बजावता आले, असे चव्हाण यांनी सांगितले.