खटाळे, रासकर ९७ किलो गटात अंतीम फेरीत

लोगो घेणे....
खटाळे, रासकर ९७ किलोगटात अंतिम फेरीत
अंतिम सामना शुक्रवारी; ३२ मल्‍लांनी लावली ताकद पणाला
सकाळ वृत्तसेवा
सातारा, ता. ७ : येथे सुरू असलेल्या महाराष्‍ट्र केसरी स्‍पर्धेदरम्‍यान आज जिल्‍हा क्रीडा संकुलात झालेल्‍या ९७ किलो वजनगटात सोलापूरच्‍या सुनील खटाळे आणि मुंबईच्‍या वैभव रासकर यांनी अंतिम फेरीत प्रवेश केला. या वजनगटाचा अंतिम सामना शुक्रवारी होणार असून, यात कोण बाजी मारतो, याकडे सातारकरांसह कुस्‍तीशौकिनांचे लक्ष लागून राहिलेले आहे.
जिल्‍हा क्रीडा संकुलात महाराष्‍ट्र केसरी स्‍पर्धा सुरू आहे. या स्‍पर्धेदरम्‍यान आज सायंकाळच्‍या सत्रात विविध वजनगटांबरोबरच महाराष्‍ट्र केसरीच्‍या लढती घेण्‍याचे संयोजकांनी जाहीर केले होते. त्यानुसार सायंकाळी पाचच्‍या सुमारास लढती सुरू झाल्‍या. स्‍पर्धेसाठी तयार केलेल्‍या गादी प्रकारातील एक क्रमांकाच्या आखाड्यावर ९७ किलो वजनी गटाच्‍या लढती घेण्‍यात आल्‍या. पंचांनी पुकारा करत त्‍या गटात खेळणाऱ्या मल्‍लांना उपस्‍थित करत त्‍यांच्‍या जोड्या जाहीर केल्‍या. प्राथमिक फेरीत ३२ मल्‍लांच्‍या १६ जोड्यांमध्‍ये लढत झाली. या लढती संपल्यानंतर त्‍यातील १६ मल्‍लांची गुणानुक्रमानुसार आठ जोड्या तयार करण्‍यात आल्‍या. जोडीतील प्रत्‍येक मल्‍ल गादी प्रकारात मिळवलेले कसब, ताकदपणाला लावत समोरच्‍याची ताकद आजमावत होता. या फेऱ्या पार पडल्‍यानंतर त्‍यातील ८ मल्‍लांच्‍या ४ जोड्या करत लढती घेण्‍यात आल्‍या. उपउपांत्‍य फेरीसाठीच्‍या लढती जाहीर करण्‍यात आल्‍या. त्यात सुनील खटाळे (सोलापूर) आणि तुषार ठोंबर (सातारा) यांच्‍यात कुस्‍तीत खटाळे विजयी झाला. त्यानंतर रोहित कारले (पुणे) आणि रमेश बहीरनाळ (बीड) यांच्‍यातील लढतील कारलेने बाजी मारली. धनाजी कोळी (वाशीम) व वैभव रासकर (मुंबई) यांच्‍यातील लढतीत रासकर, तर नीलेश केदारी (पुणे शहर) आणि सनिकेत राऊत (कोल्‍हापूर) यांच्‍यातील लढतीत राऊत विजयी झाला.
या लढती संपल्‍यानंतर उपांत्य फेरीसाठीच्‍या दोन जोड्या जाहीर करण्‍यात आल्‍या. त्यात सुनील खटाळे (सोलापूर) व रोहित कारळे (पुणे), तर वैभव रासकर (मुंबई) आणि सनिकेत राऊत (कोल्हापूर) यांच्‍यात लढत झाली. त्यात खटाळेने जास्‍तीचे २, तर रासकरने जास्‍तीचे ११ गुण मिळवत अंतिम फेरीत प्रवेश केला. अंतिम फेरीत प्रवेश केलेल्‍या रासकर आणि खटाळे यांच्‍यात शुक्रवारी सायंकाळी अंतिम लढत होईल.