चार शाळांतील पाचशे विद्यार्थ्यांना सर्पजागृतीचे मार्गदर्शन

01902
वन्यजीव विभागातर्फे चार शाळांत सर्पजागृती
आंबा : वन महोत्सवानिमित्त वन्यजीव आंबा परिक्षेत्राच्या वतीने चार शाळांमधील पाचशे विद्यार्थ्यांना सर्पजागृतीसंदर्भात मार्गदर्शन केले. पश्चिमेकडील आंबा हायस्कूल, चांदोली, परळे निनाई व वाकोली या चार शाळांमधील सुमारे पाचशे विद्यार्थ्यांशी संवाद साधला. यावेळी वनप्रतिज्ञा घेण्यात आली. विद्यार्थ्यांना स्लाइड शो दाखविला. सह्याद्री व्याघ्र प्रकल्पाचे निसर्ग संवादक तज्ज्ञ सचिन धायगुडे यांनी सापांच्या जाती, सापांविषयीचे गैरसमज, खबरदारी, काळजी आणि उपायांबाबत मार्गदर्शन केले. आंबा (गोलीवणे) विभागाचे परिमंडल अधिकारी सागर पोवार यांनी वन्यप्राणी संपदेचे महत्त्व विशद केले. जनतेने परिक्षेत्रात अवैध वृक्षतोड व अवैध शिकार करणाऱ्यांची नावे कळविण्याचे आवाहन पोवार यांनी केले. यावेळी परिमंडल अधिकारी शिवाजी पाटील, वनरक्षक अरविंद पाटील, किरण दळवींसह शाळांचे मुख्याध्यापक, शिक्षक उपस्थित होते.