गगनबावडा तालुक्यात पावसाची हजेरी

गगनबावडा तालुक्यात पावसाची हजेरी
असळज, ता.१६ : गेले काही दिवस तालुक्यातील बळीराजा पावसाच्या प्रतीक्षेत होता. शुक्रवारी तालुक्यात पावसाने हजेरी लावली. दिवसभर पावसाची रिपरिप सुरु झाल्याने गगनबावडा तालुक्यातील शेतकरी वर्ग सुखावला आहे. भातरोप लागणीसाठी टाकलेल्या तरव्यांना जीवदान मिळाले आहे.
जूनचा पहिला पंधरवडा संपला तरी पावसाचा पत्ता नसल्याने तालुक्यातील शेतकरी वर्ग चिंतेत होता. विद्युत मोटारीच्या साह्याने पाणी उपसा करून रोप लागण्यासाठी तरव्यांची पेरणी केली होती. पाटबंधारे विभाग वेळोवेळी पाणी उपसाबंदी आदेश लागू करत असल्याने शेतकरी वर्गात चिंतेचे वातावरण होते. पावसाने आजअखेर दिलेल्या हुलकावणीने केव्हा एकदाचा पाऊस सुरू होतो याकडे बळीराजाचे डोळे लागून राहिले होते. शुक्रवारी सकाळपासूनच तालुक्याच्या पश्चिम भागात पावसाची रिपरिप सुरु झाली आहे.