रोहिणीचा पेरा अखेरच्या टप्प्यावर

02427

बिद्री परिसरातील शिवारात
भात पेरणीासाठी लगबग

बिद्री ता. २ : कागल तालुक्याच्या पश्चिमेकडील बिद्रीसह बोरवडे, फराकटेवाडी, उंदरवाडी, वाळवे खुर्द परिसरात भात पेरणी अखेरच्या टप्प्यात आली आहे. शेत शिवारात शेतकरी, मजुरांची लगबग असल्याचे चित्र दिसून येते.
यंदा भात बियाणे व तणनाशकांच्या दरात किरकोळ पाच ते सात टक्के दर वाढ झाल्याची माहिती येथील ज्ञानराज कृषी सेवा केंद्राचे मालक स्वानंद रामाने यांनी दिली. परंपरागत भात बियाण्यांचा पेरा न करता कमी दिवसात येणारे व ज्यादा उत्पन्न देणारी संकरित भात बियाण्यांना मागणी मोठी असल्याचे त्यांनी सांगितले. पारंपरिक जया, दोडका, हावळे, काळा जिरगा, फुले समृद्धी, रक्त साळी ही भातांची वाण कालबाह्य झाली आहेत. यंदा संकरित १०० ते १२० दिवसांत येणारी भात बियाणे अवनी, अनोखी, सुंदर, जगती, सारथी, सुप्रीम,सोना, राशी पूनम तसेच १२५ ते १३० दिवसांत येणारे नवीन संकरित भात बियाणे अजिता, शुभांगी, अमुघ, अस्मिता, गोरखनाथ, अवनी, बाहुबली, एनपीए १२५, एम.पी.आर. ५०५ भात बियाण्यांना चांगली मागणी आहे.