निगवेतील पुलावरील रस्त्याची दुरवस्था - वाहनांची कसरत, अपघाताचा धोका

01526
निगवे दुमालातील पुलावरील
रस्त्यावर खड्डेच खड्डे

सकाळ वृत्तसेवा

भुये, ता. १३ : निगवे दुमाला (ता. करवीर) येथील पुलावरील रस्त्याची दुरवस्था झाली आहे. तात्पुरता मुरूम टाकून डागडुजी केल्यामुळे पुन्हा पुलावरील रस्ता उखडला आहे. त्यामुळे वाहतुकीस धोका निर्माण झाला आहे.
निगवे दुमालातील पुलावरील रस्त्याची दुरवस्था झाली आहे. वारंवार तक्रार करूनदेखील सार्वजनिक बांधकाम विभागाने याकडे दुर्लक्ष केले आहे. पावसाळा जवळ आल्यामुळे आणि मुरूम उघडल्यामुळे पुलावर चिखल होऊन गाड्या घसरण्याची होण्याची शक्यता आहे. मुरूम उखडला गेल्यामुळे जागोजागी खड्डे पडले आहेत. त्यामुळे गाडी चालवताना कसरत करावी लागते. रात्रीच्या वेळी मोठा अपघात होण्याची शक्यता आहे. वडणगे, निगवे, भुयेवाडी, भुये, जठारवाडी हा रस्ता महामार्गाला जोडल्यामुळे येथे मोठ्या प्रमाणात वाहतूक वाढली आहे. या मार्गावर जड वाहतुक वाढल्यामुळे रस्ता उखडला गेला आहे. तसेच मलकापूर, बांबवडे मार्गे येणारी वाहतूकदेखील याच मार्गाने जाते. क्रेशरचा कारखाना असल्यामुळे डंपरचीही वाहतूक वाढली आहे. पावसाळ्यामध्ये चिखल होऊन दोनचाकी गाड्या घसरून अपघात होण्याची शक्यता आहे. पुलावर काही ठिकाणी कठडे नसल्यामुळे रात्रीच्या वेळी पुलावरून वाहन ओढ्यात जाऊ शकते. त्यामुळे अपघात टाळण्यासाठी पावसाळ्यापूर्वी रस्ता करावा; अशी मागणी वाहनधारकांतून होत आहे.