मोहरे हायस्कूलमध्ये व्याख्यान

03436
अन्याय संपविण्यासाठी
शिवरायांचा जन्म ः पाटील

बोरपाडळे : ‘छत्रपती शिवरायांचे चरित्र डोळ्यांसमोर ठेवल्यास जीवनात नक्कीच यश मिळेल. त्यांनी लहानपणीच हिंदवी स्वराज्याची स्वप्ने पाहिली. साधे खेळ न खेळता त्यांनी हातात तलवार, भाले आणि ढाली घेतल्या. त्यांच्या स्वराज्याच्या स्वप्नाला खरा आधार जिजाऊ ठरल्या. अन्याय, अत्याचार, जुलूम संपविण्यासाठी शिवरायांचा जन्म झाला होता. शून्यातून निर्माण केलेले स्वराज्य आजही जगाला प्रेरणा देणारे असून त्यांच्या आदर्शवत चरित्रातून विद्यार्थ्यांनी जीवन घडवावे,’ असे आवाहन इतिहासतज्ज्ञ के. एन. पाटील यांनी केले. ते मोहरे (ता. पन्हाळा) येथील मोहरे हायस्कूलमध्ये ‘शककर्ते शिवाजी महाराज’ विषयावर आयोजित व्याख्यानात बोलत होते. मुख्याध्यापक किसान चौगुले यांनी प्रास्ताविक केले. यावेळी मुख्याध्यापक, शिक्षक वृंद, कर्मचारी आणि विद्यार्थ्यांची उपस्थिती होती.