शेतकऱ्यांवर दुबार तरवा पेरणीचे संकट

4646
शिरगाव : वाफ्यात पाणी साठून राहिल्याने भात पिकाची उगवण न झालेला तरवा.
.....
शेतकऱ्यांवर दुबार तरवा पेरणीचे संकट

अतिपावसाचा परिणाम ः उगवलेला तरवाही पक्ष्यांकडून फस्त

सकाळ वृत्तसेवा
शिरगाव, ता. २४ : मृग नक्षत्रात शेतकऱ्यांनी भात पिकाच्या लावणीसाठी शिवारात पेरणी केलेल्या वाफ्यात पाणी साचल्याने भाताच्या तरव्यांच्या उगवणीवर परिणाम झाला आहे. काही शेतकऱ्यांचे उगवण झालेले तरवे गव्यांनी व पक्ष्यांनी खाऊन सुपडासाफ केले आहेत. त्यामुळे शेतकऱ्यांवर दुबार भात तरवे पेरणीची वेळ आली आहे. त्यामुळे मे महिन्यातील वळीव आणि त्यानंतर झालेल्या मॉन्सूनपूर्व पावसामुळे शेतकऱ्याना रोज एका नव्या समस्यांचा सामना करावा लागत आहे.
राधानगरी तालुक्यात मॉन्सूनपूर्व पावसाने व त्यानंतर सुरू झालेल्या मृग नक्षत्रातील जोरदार पावसामुळे शेतकऱ्यांना संकटाशी रोज सामना करावा लागत आहे. मेच्या दुसऱ्या पंधरवड्यात झालेल्या वळवाच्या पावसाने शेतकऱ्यांच्या रब्बी हंगामातील पिके काढणी व खरिपाच्या पेरणीपूर्व मशागतीची तसेच भात, भूईमूग व अन्य पिकांच्या पेरणीच्या कामांचे वेळापत्रक कोलमडून गेले. त्यानंतर जून महिन्यात कमी अधिक प्रमाणात पाऊस सुरूच आहे. अशा प्रतिकूल परिस्थितीतही नैसर्गिक आपत्तीशी दोन हात करत पावसाची उघडीप मिळेल त्यावेळी शेती कामे उरकून घेतली. सध्या भुईमूग पेरणीची कामे अंतिम टप्प्यात आली आहेत.
मॉन्सूनपूर्व पावसामुळे यावर्षी शेतकऱ्यांना रोहिणी नक्षत्रात भात पिकाच्या धूळवाफ पेरणी करता आली नाही. त्यामुळे भात पिकाच्या रोपलावणीशिवाय पर्याय उरलेला नाही. त्यामुळे शेतकऱ्यांनी बागायती व कोरडवाहू जमिनीत रोपलावणीसाठी मृग नक्षत्रात भाताची तरवा पेरणी केली होती. मात्र, सततच्या पावसामुळे शिवारात पाणी साचल्याने तरव्यांच्या उगवण क्षमतेवर परिणाम झाला असून, काही शेतात उगवण विरळ झाली आहे, तर काही ठिकाणी उगवण झालेली नाही. उगवण झालेले वाफ्यातील तरवे भात, पक्षी व गव्यांकडून खाऊन फस्त केले आहेत.