तुळशी, धामणी परिसरात मॉन्सूनपूर्व शेतीकामांना वेग

01575
धामोड (ता. राधानगरी) ः येथे ऊस भरणीची कामे अंतिम टप्प्यात आली आहेत. (छायाचित्र : केरबा जाधव)
.........
तुळशी, धामणी परिसरात
मॉन्सूनपूर्व शेतीकामांना वेग

सकाळ वृत्तसेवा
धामोड, ता. १४ : राधानगरी तालुक्याच्या पश्चिम तुळशी व धामणी परिसरात मॉन्सूनपूर्व शेतीच्या कामाला वेग आला आहे. उष्णतेचा पारा वाढत असतानाही येथील शेतकरी मशागतीच्या कामात मग्न झाला आहे. ऊस भरणीची कामेही अंतिम टप्प्यात आली आहेत.
राधानगरी तालुक्याच्या पश्चिम परिसरामध्ये अद्यापही वळवाने हुलकावणी दिली आहे. मे महिन्यात शेतीची धांदल सुरू होते. सध्या माळरानावरील भातशेतीसाठी बैलांच्या सहाय्याने शेत तयार करण्याची कामे सुरू आहेत. त्याचबरोबर नांगरणी, बांध घालणे या कामात शेतकरीवर्ग गुंतलेला पाहायला मिळत आहे. भातशेतीसाठी तरवे तयार करण्याचे कामही सुरू आहे. परिसरात सर्वाधिक ऊसपीक घेतले जाते. ऊस भरणीची कामे अंतिम टप्प्यात आहेत. मशागतीच्या कामासाठी शेतकरीवर्गातून ट्रॅक्टर साधनाला पसंती दिली जाते आहे.