तुळशी नदीत बेकायदेशीर मासेमारी

धामोडला वीजप्रवाह नदीत सोडून मासेमारी
तुळशी नदीपात्रातील बेकायदा प्रकार; कारवाईची गरज

धामोड, ता. २७ : येथील तुळशी नदी पात्रात बेकायदा वीज प्रवाहाने मासेमारी करण्याचे प्रकार सुरू आहेत. चार वर्षांत तुळशी नदीत बेकायदा मासेमारी करताना तिघांना जीवाला मुकावे लागल्याचे उदाहरण आहे. तरीही याकडे गांभीर्याने पाहिले जात नाही. प्रशासनाने सोयीस्कर दुर्लक्ष केले आहे. पाटबंधारे विभागाने बेकायदा मासेमारी करणाऱ्यांवर कडक कारवाईची गरज आहे.
तुळशी धरण राधानगरी व करवीर तालुक्यांना वरदान ठरले आहे. तुळशी नदीमुळे ४६ गावांना सिंचनाचा लाभ झाला आहे. धरणामुळे धामोड ते आरे (ता. करवीर) येथे हरितक्रांती अवतरली. दोन वर्षांमध्ये ऑगस्टमध्ये हे धरण पूर्ण क्षमतेने भरले जाते. त्यामुळे पाणीटंचाईचा सामना परिसरातील गावांना करावा लागत नाही .
सध्या तुळशी धरण पूर्ण क्षमतेने भरले आहे. तुळशी नदीतील मासे रुचकर असल्याने जिल्ह्यातून खवय्यांची पहिली पसंती येथील माशाला दिली जाते. पाण्याचा विसर्ग कमी झाल्याने तुळशी नदीपात्रात माशासाठी स्थानिक व करवीर तालुक्यातील लोकांकडून बेकायदा मासेमारी केली जाते. नदीशेजारून जाणाऱ्या वीज वाहिनीवरून धोकादायक रीतीने वीजजोडणी करून नदीत वीजप्रवाह सोडला जात आहे. यातून मोठ्या प्रमाणात मासेमारी केली जात आहे.
गतवर्षी धामोड पैकी नऊ नंबर येथे तुळशी नदीत अशाच प्रकारे बेकायदा मासेमारी करताना एकाला जीव गमवावा लागला होता. तरीही सध्या तुळशी नदीत बेकायदा मासेमारीला ऊत आला आहे. प्रशासनाचे कडक धोरण अवलंबून कारवाई करण्याची गरज आहे.

कोट
बेकायदा मासेमारी करणे जीवावर बेतणारी बाब आहे. प्रशासनाने याबाबत योग्य कारवाई करण्याची गरज आहे. याबाबत प्रशासनाने कडक धोरण अवलंबावे.
- आनंदा चव्हाण, रहिवासी, धामोड

तुळशी नदीत होत असलेल्या बेकायदा मासेमारीबाबत ग्रामपंचायत व पोलिस ठाण्यात लेखी निवेदन दिले आहे. अशी बेकायदा मासेमारी करणाऱ्यांवर कडक कारवाई केली जाईल.
- अंजली कारेकर, शाखा अभियंता, तुळशी धरण