गोडसाखर अध्यक्ष निवड

गोडसाखर अध्यक्ष निवडीसाठी
सोमवारी संचालक मंडळाची सभा

गडहिंग्लज, ता. ३० : आप्पासाहेब नलवडे गडहिंग्लज साखर कारखान्याच्या (गोडसाखर) अध्यक्ष निवडीसाठी सोमवारी (ता. ७) दुपारी एक वाजता संचालक मंडळाची खास सभा होणार आहे. कारखान्याच्या सभागृहात प्रादेशिक साखर सहसंचालक गोपाळ मावळे यांच्या अध्यक्षतेखाली ही सभा होईल.
कारखान्याचे उपाध्यक्ष प्रकाश चव्हाण यांच्यासह १२ संचालकांनी अध्यक्ष डॉ. प्रकाश शहापूरकर यांच्यावर एकतर्फी कारभाराचा आरोप करून त्यांचे सहीचे अधिकार काढून घेण्यासाठी दिलेल्या पत्रावर मावळे यांनी सहा सप्टेंबरला संचालक मंडळाची सभा बोलावली होती. दरम्यान, दोन सप्टेंबर रोजी डॉ. शहापूरकर यांनी आपल्या पदाचा राजीनामा दिला होता. त्यानंतरच्या संचालक मंडळ सभेत हा राजीनामा मंजूर करून साखर सहसंचालक कार्यालयाकडे पाठविला होता. तेथून हा राजीनामा सहकार प्राधिकरणाकडे गेला होता. प्राधिकारणने हा राजीनामा मंजूर करून नवे अध्यक्ष निवडीसाठी परवानगी दिली. त्यानुसार आता सात सप्टेंबर रोजी अध्यक्ष निवड होणार आहे. दरम्यान अध्यक्षपदासाठी प्रकाश चव्हाण, प्रकाश पताडे यांच्या नावाची चर्चा आहे. परंतु, कारखान्यातील सत्तारूढ आघाडीचे नेते हसन मुश्रीफ यांच्या निर्णयावरच अध्यक्षपदी कोण विराजमान होणार हे ठरणार आहे. तत्पूर्वी, ते संचालक मंडळाची बैठक घेऊन यावर चर्चा करणार असल्याचे समजते.