‘डीवायपी’मध्ये लवकरच ड्रोन तंत्रज्ञान अभ्यासक्रम

08207
तळसंदे : डी. वाय. पाटील कृषी व तंत्र विद्यापीठात करारावेळी कुलगुरू डॉ. के. प्रथापन, कुलसचिव डॉ. जे. ए. खोत, ओ. एस. इनामदार, डॉ. संदीप वाटेगावकर, अल्बाकी सय्यद आदी उपस्थित होते.
--------
‘डीवायपी’मध्ये लवकरच ड्रोन तंत्रज्ञान अभ्यासक्रम
घुणकी, ता. २९: शेती विकसित करण्यासाठी ड्रोन तंत्रज्ञानाचा वापर काळाची गरज आहे. या कंपनीचा पुण्यानंतर पश्चिम महाराष्ट्रात कोठेही अभ्यासक्रम उपलब्ध नाही. त्यामुळे कोल्हापूर विभागातील विद्यार्थ्यांना लवकरच तळसंदे येथील डी. वाय. पाटील कृषी व तंत्र विद्यापीठात हा अभ्यासक्रम पूर्ण करता येणार आहे. याचा विद्यार्थ्यांना फायदा होईल, अशी माहिती डी. वाय. पाटील कृषी व तंत्र विद्यापीठाचे कुलगुरू डॉ. के. प्रथापन यांनी दिली.
तळसंदे (ता. हातकणंगले) येथील डी. वाय. पाटील कृषी व तंत्र विद्यापीठात ड्रोन तंत्रज्ञान अभ्यासक्रम सुरु होणार आहे. याबाबत पुणे येथील बेरी एव्हीओनिक्स आणि डी. वाय. पाटील कृषी व तंत्र विद्यापीठ, तळसंदे यांच्यात नुकताच सामंजस्य करार झाला.
बेरी एव्हीओनिक्स ही कंपनी अमेरिकेच्या वर्ल्ड ट्रेंड सेंटरशी संलग्नित असून उच्च कार्यक्षमतेचे ड्रोन तयार करते. यामध्ये ड्रोन डिझाईन, उत्पादन व विक्री या संबंधित सेवा देते. ऑटो-पायलट तंत्रज्ञानाचा वापर करून प्रभावी ड्रोन बनवण्याचे ज्ञान या कंपनीमार्फत दिले जाते. सामंजस्य करारामुळे विद्यार्थ्यांना ड्रोन तंत्रज्ञानातील नवनवीन गोष्टी शिकायला मिळणार आहेत. अभ्यासक्रम पूर्ण केल्यानंतर ते एकतर उद्योजक बनू शकतात किंवा ड्रोन इंडस्ट्रीमध्ये सहज नोकरी मिळवू शकतात. करारामध्ये विद्यार्थी- प्राध्यापक विनिमय कार्यक्रम, जोड प्रकल्प, प्रगत संशोधन अशा बहूआयामी बाबी राबवण्यात येणार आहेत. कुलसचिव डॉ. जे. ए. खोत म्हणाले, ‘विविध प्रशिक्षण, कार्यशाळा, प्रस्ताव, सेमिनार, कौशल्ययुक्त कोर्सेस संयुक्तरित्या राबवण्यासाठी कटिबद्ध राहू.’ डॉ. संदीप वाटेगावकर, बेरी एव्हीओनिक्सचे व्यवस्थापकीय संचालक ओ. एस. इनामदार, अल्बाकी सय्यद उपस्थित होते.