गारगोटीत ब्लड बँकेची गरज

संग्रहित फोटो वापरावा...
.............
गारगोटीत ब्लड बँकेची गरज

रक्ताची वाढती मागणी : रक्तासाठी नातेवाइकांना करावी लागते धावपळ

सकाळ वृत्तसेवा
गारगोटी, ता. ६ : दोन लाखांवर लोकसंख्या असलेल्या भुदरगड तालुक्यात एकही रक्तपेढी (ब्लड बँक) नाही. तालुक्यातील वाढती रुग्णसंख्या आणि रक्ताची वाढती मागणी लक्षात घेता स्थानिक पातळीवर रक्तपेढीची नितांत गरज भासू लागली आहे. येथे रक्ताअभावी रुग्णांची हेळसांड होत आहे, तर रक्त उपलब्ध करताना नातेवाइकांची धावपळ उडत आहे.
भुदरगड तालुक्यातील गारगोटी हे तालुक्याचे ठिकाण आहे. शासनाने येथील ग्रामीण रुग्णालयाला उपजिल्हा रुग्णालयाचा दर्जा दिला आहे. याचबरोबर शहरात अनेक खासगी रुग्णालये आहे, तर तालुक्यात ग्रामीण रुग्णालये, उपकेंद्रे कार्यरत आहे. याठिकाणी दररोज हजारो रुग्ण उपचार घेतात. मात्र, यातील गंभीर आजार व दीर्घकाळ आजारी असणाऱ्या अनेक रुग्णांना सतत रक्ताची गरज भासत आहे.
येथील शासकीय व खासगी रुग्णालयांत स्थानिक पातळीवर दैनंदिन रक्त संकलन व रक्तसाठा करणारी कोणतीही यंत्रणा कार्यरत नाही. यामुळे रक्ताची वारंवार गरज भासणाऱ्या रुग्णांना कोल्हापूर किंवा इतर ठिकाणच्या रुग्णालयात न्यावे लागते. याचा रुग्णाला निमूटपणे शारीरिक व मानसिक त्रास सहन करावा लागतो. शिवाय नातेवाइकांना रक्त मिळविताना वशिला, पैसा, वेळ अशा पातळीवर तारेवरची कसरत करावी लागते.
भुदरगड तालुक्यात गावागावांतील अनेक मंडळे, संस्था दरवर्षी सामाजिक उपक्रम म्हणून रक्तदान शिबिर घेतात. या शिबिरावेळी स्थानिक रक्तपेढी नसल्याने बाहेरील रक्तपेढीचे सहकार्य घेतात. परंतु जेव्हा रक्तदात्याच्या नातेवाइकाला रक्ताची गरज भासेल तेव्हा तेथून बऱ्याचवेळा वेळेत रक्त मिळेल याची शाश्वती नसते. त्यामुळे स्थानिक पातळीवर रक्तपेढी सुरू व्हावी, अशी मागणी होत आहे.
.....