मुलापाठोपाठ आईचाही मृत्यू

03974
मुलापाठोपाठ अपघातातील
जखमी आईचाही मृत्यू

हातकणंगले, ता. ३० : दोन दिवसांपूर्वी कुंभोज - दानोळी मार्गावर मोटार व मोटासायकल यांच्यात झालेल्या अपघातात गंभीर जखमी झालेल्या महिलेचा आज उपचार सुरू असताना मृत्यू झाला. या अपघातात दुचाकीस्वार जागीच ठार झाला होता.
हातकणंगले तालुक्यातील माणगाव येथील तानाजी बाजीराव कोळी, त्यांची आई शांताबाई कोळी आणि मुलगी वैष्णवी कोळी हे सांगलवाडीहून दोन दिवसांपूर्वी मोटारसायकलवरून दानोळी, कुंभोज मार्गे माणगावकडे येत होते. ते कुंभोज-दानोळी मार्गावरील चौगुले मळ्याशेजारी आले असता मोटार आणि मोटारसायकलची समोरासमोर धडक होऊन झालेल्या अपघातात मोटारसायकलस्वार तानाजी बाजीराव कोळी (वय ४८) जागीच ठार झाले होते, तर मागे बसलेल्या शांताबाई (वय ७०), मुलगी वैष्णवी (वय १३) गंभीर जखमी झाल्याने त्यांना उपचारासाठी सांगली सिव्हिल हॉस्पिटलमध्ये दाखल केले होते. शांताबाई यांची प्रकृती चिंताजनक असल्याने त्यांना कोल्हापुरातील खासगी रुग्णालयात उपचारासाठी दाखल केले होते. उपचार सुरू असताना आज सायंकाळी त्यांचा मृत्यू झाला. अपघातात मुलगा आणि आईचा मृत्यू झाल्याने माणगावसह परिसरात हळहळ व्यक्त होत आहे.