हिंस्र प्राण्यांच्या हल्ल्यात हुपरीत १७ बकरी ठार

हिंस्र प्राण्यांच्या हल्ल्यात
हुपरी येथे १७ बकऱ्या ठार
हुपरी, ता. १३ : हिंस्र प्राण्यांनी केलेल्या हल्ल्यात येथे शेतात बसवलेल्या १७ बकऱ्या मृत्युमुखी पडल्या. यामुळे दोघा मेंढपाळांना आर्थिक नुकसानीचा मोठा फटाका बसला आहे. दरम्यान, वनखात्याच्या पथकाने घटनास्थळी भेट देऊन पाहणी केली. ही घटना शनिवारी (ता. ११) रात्री घडली.
याबाबतची अधिक माहिती अशी, येथील शरद गाट यांच्या तळंदगे रोडलगतच्या तपोवन मळा येथील शेतात बापू कृष्णा मुधाळे, साताप्पा बापू मुधाळे, सिद्धू मुधाळे (सर्व रा. हुपरी) या तिघा मेंढपाळांच्या चारशेंच्या वर मेंढ्यांचा कळप खतासाठी बसवण्यात आला आहे. शनिवारी रात्रीच्या सुमारास विजेच्या कडकडाटांसह पाऊस सुरू झाला. त्यामुळे सोबतचे मेंढपाळ शेजारच्या शेडमध्ये आडोशाला गेले. यावेळी हिंस्त्र प्राण्यांनी मेंढरांच्या तळावर हल्ला चढवला. त्यात बापू मुधाळे यांच्या १२ व साताप्पा मुधाळे यांच्या पाच अशा १७ बकऱ्या मृत्युमुखी पडल्या.
याबाबतची माहिती समजताच वनरक्षक मंगेश वंजारे, तालुका पशुवैद्यकीय विस्तार अधिकारी डॉ. माळी, हातकणंगलेचे वनपाल विजय कांबळे, वनरक्षक अरुण खामकर, लहू भंडारे, आदींच्या पथकाने घटनेचा पंचनामा केला.