कुत्र्याच्या हल्ल्यात बालिका जखमी

जयसिंगपुरात कुत्र्याच्या
हल्ल्यात बालिका जखमी

जयसिंगपूर : शहरातील अवचितनगर भवानी चौकालगत असणाऱ्या हनुमान मंदिराजवळ अंगणात खेळत असलेल्या चार वर्षाच्या बालिकेवर भटक्या कुत्र्यांनी हल्ला केला. यात ती गंभीर जखमी झाली. सानवी उमेश घोडके जखमी बालिकेचे नाव असून तिच्यावर शहरातील खासगी रुग्णालयात उपचार सुरू आहेत. शनिवारी (ता.१५) दुपारी एक वाजण्याच्या सुमारास येथील अवचितनगर जयभवानी चौकात नजीक वास्तव्यास असलेल्या उमेश घोडके यांची चार वर्षाची मुलगी सानवी ही अंगणात खेळत होती. अचानकपणे परिसरात असलेल्या भटक्या कुत्र्यांनी तिच्यावर हल्ला केला. यामध्ये या बालिकेला चेहरा आणि पाठीवर मोठ्या जखमा झाल्या आहेत. तातडीने तिला येथील खासगी रुग्णालयात दाखल करण्यात आले आहे. जयसिंगपूर शहर आणि परिसरात भटक्या कुत्र्यांची संख्या मोठ्या प्रमाणात वाढली असून या मोकाट जनावरांचा तातडीने बंदोबस्त करावा, अशी मागणी होऊ लागली आहे.