तमदलगेच्या ४५५ मिळकत धारकांना मिळणारच सनद

तमदलगेच्या मिळकतधारकांना
मिळणार सनद ः राकेश खोंद्रे

जयसिंगपूर, ता.६ : महाराष्ट्र शासनाच्या सॉमित्व योजना अंतर्गत तमदलगे (ता. शिरोळ) येथील ४५५ मिळकतधारकांना रविवारी (ता.११) मुख्यमंत्री एकनाथ शिंदे यांच्याहस्ते गांधी मैदान कोल्हापूर येथे सनद वाटप होणार आहे. ही माहिती शिवसेना युवासेना कोल्हापूर जिल्हा अध्यक्ष राकेश खोंद्रे यांनी दिली.
मिळकतींचा नकाशा तयार होऊन सीमा निश्चित होणार आहेत. मिळकतीच्या नेमक्या क्षेत्राची माहिती होणार आहे. मालकी हक्काची मिळकत पत्रिका तयार होईल. गावातील रस्ते, खुल्या जागा, नाले यांच्या सीमा निश्चित होऊन अतिक्रमण रोखता येणार आहे. शासनाच्या मालकीच्या मिळकतींचे संरक्षणही यामुळे होणार आहे. ग्रामपंचायतीकडील मालमत्ता कर निर्धारण पत्रक तयार होणार असून गावातील मालकी हक्क व हद्दीबाबतचे वाद यामुळे नाहीसे होणार असल्याचेही श्री. खोंद्रे यांनी सांगितले.