फसवणूक

महिलेची १८ लाखांची फसवणूक

जयसिंगपूर, ता.१०: फ्री टॅक्स वापरून युट्यूब चॅनेलला सबस्क्राइब केल्याने एका सबस्क्राइबरला १५० रुपये मिळतील, असा विश्वास संपादन करून प्रगती महेश कुरणे (वय ३६, सध्या रा. दुसरी गल्ली, जयसिंगपूर, मूळगाव नदीवेस, मिरज, जि.सांगली) या बँक कर्मचारी महिलेची १८ लाख ६० हजार रुपयांची फसवणूक करण्यात आली. याप्रकरणी अज्ञातावर जयसिंगपूर पोलिसात गुन्हा दाखल करण्यात आला आहे. ही घटना २० जून ते ३० जून या मुदतीत घडली.
याबाबत अधिक माहिती अशी, प्रगती कुरणे यांना २० जून ते ३० जूनच्या दरम्यान अज्ञात मोबाईलधारकाने फ्री टॅक्स वापरून युट्यूब चॅनेलला सबस्क्राइब केल्याने एका सबस्क्राइबरला १५० रुपये मिळतील, असे सांगून फ्री टास्क वापरण्यास सांगून ६५० रुपये पाठविले आणि कुरणे यांचा विश्वास संपादन केला. त्यानंतर प्रिपेड टास्क वापरण्यास भाग पाडून कुरणे यांच्या बँक खात्यातून आरटीजीएस, एनइएफटी, युपीआय व बँकेच्यामोबाईल अ‍ॅपमधून संशयित आरोपीच्या वेगवेगळ्या बँक खात्यावर १८ लाख ६० हजार रुपये पाठविण्यास भाग पाडले. त्यानंतर ही रक्कम कमिशनसह परत देतो, असे सांगून कुरणे यांची फसवणूक केली. याप्रकरणी अधिक तपास पोलिस निरीक्षक संदीप कोळेकर करीत आहेत.