कळे बाजारपेठेत विजेचा लपंडाव

कळे बाजारपेठेत विजेचा लपंडाव

व्यापाऱ्यांसह नागरिकांना नाहक त्रास; आंदोलनाचा इशारा

सकाळ वृत्तसेवा
कळे, ता. ५ : कोल्हापूरच्या पश्र्चिम भागातील सर्वात मोठी बाजारपेठ असणाऱ्या कळे (ता. पन्हाळा) बाजारपेठेत काही दिवसांपासून विजेचा लपंडाव सुरू आहे. वारंवार खंडित होणाऱ्या विजेमुळे व्यापाऱ्यांना आर्थिक भुर्दंड, तर नागरिकांना नाहक त्रास सहन करावा लागत आहे. महावितरणने वीजपुरवठा सुरळीत न केल्यास व्यापाऱ्यांसह ग्रामस्थांनी आंदोलनाचा इशारा दिला आहे.
कळे वीज वितरण केंद्रातून परिसरातील अनेक गावांना वीजपुरवठा होतो. काही दिवसांपासून अनियमित वीजपुरवठा आहे. दुरुस्ती व लाईन फॉल्टच्या नावाखाली दररोज वीज खंडित केली जाते. दुरुस्तीसाठी सोमवार राखीव दिवस असूनही इतर दिवशीही वीजपुरवठा वारंवार खंडित होतो. लाईन फॉल्ट झाल्यावर तीन-चार तास वीज येत नाही. पूर्वकल्पना न देता दिवसभर वीजपुरवठा बंद झाल्याने सर्वांच्या कामाचा खोळंबा होत आहे. वीजपुरवठा बंद झाल्याने मोबाईल, दूरध्वनी, इंटरनेट, झेरॉक्स बंद राहिल्याने दैनंदिन व्यवहारांवर मर्यादा येत आहेत. कळे वीज वितरण कार्यालयातून इतरत्र वीजपुरवठा होतो. कळे बाजारपेठेत वीजपुरवठ्याबाबत दुजाभाव होत असल्याचा आरोप नागरिकांतून होत आहे. महावितरणने वीजपुरवठा सुरळीत न केल्यास कळे ग्रामस्थ व व्यापाऱ्यांतर्फे आंदोलनाचा इशारा दिला आहे.
.....
चौकट...
विजेच्या लपंडावामुळे नागरिक व व्यापाऱ्यांना नाहक त्रास होत आहे. वीजपुरवठा अखंडितपणे सुरू ठेवावा; अन्यथा तीव्र आंदोलन करण्यात येईल.
संजय पाटील, माजी संचालक, यशवंत बँक, लि. कुडित्रे
.............