कबनूर नगरपरिषद, आरोग्य केंद्रास मिळणार गती

कबनूर नगरपरिषद, आरोग्य केंद्रास मिळणार गती
अधिवेशनात आमदार प्रकाश आवाडे यांच्याकडून प्रश्‍न उपस्थित
सकाळ वृत्तसेवा
कबनूर, ता. ११ ः अर्थसंकल्पीय अधिवेशनात कबनूर स्वतंत्र नगरपरिषद करण्याचा प्रश्न आमदार प्रकाश आवाडे यांनी मांडल्याने कबनूर नगरपरिषदेचा प्रश्न पुन्हा ऐरणीवर आला आहे. त्याचबरोबर कबनूर येथे प्राथमिक आरोग्य केंद्र होण्याचा प्रश्‍न मांडल्याने हे दोन्ही प्रश्‍न सुटण्यासाठी गती मिळणार आहे.
आमदार आवाडे म्हणाले, ‘कबनूर हे इचलकरंजी महानगरपालिकेला लागून असलेले व ७० हजार लोकसंख्या असलेले गाव आहे. ५० हजार लोकसंख्या झाली की त्या गावची नगरपरिषद करायची असा कायदा आहे. मात्र कबनूर नगरपरिषद करण्याबाबत वारंवार मागणी करूनही होत नाही.’
कबनूरच्या प्राथमिक आरोग्य केंद्राबाबत ते म्हणाले, ‘कबनूरची ७० हजार लोकसंख्या असून येथे प्राथमिक आरोग्य केंद्र नसल्याने नागरिकांची गैरसोय होत आहे. नागरिकांना सहा किमीवर साजणी येथील प्राथमिक आरोग्य केंद्रामध्ये तपासणीसाठी जावे लागते. लोकसंख्या विचारात घेता येथे स्वतंत्र प्राथमिक आरोग्य केंद्र तत्काळ मंजूर करावे.’