हजारो लिटर पाणी वाया,नागदेववाडी येथे पाणीपुरवठा संस्थेचे हजारो लिटर पाणी वाया

गळतीचे शुक्लकाष्ठ...

04812; 04811
‘नागदेववाडी पाणीपुरवठा’चे
हजारो लिटर पाणी वाया

बालिंगा, ता. ४ : नागदेववाडी येथील स्मशानभूमीजवळ मेन रोड गल्लीमध्ये नागदेववाडी पाणीपुरवठा संस्थेच्या मुख्य पाईपलाईनला पंधरा दिवस मोठी गळती असल्यामुळे हजारो लिटर पाणी वाया जात आहे. लिकेज काढण्यासाठी काढलेले खड्डे अपघाताला निमंत्रण देणारे ठरत आहेत. पाणीपुरवठा संस्थेने तातडीने लीकेज काढून खड्डे बुजवावेत; अशी मागणी होत आहे.
नागदेववाडी येथे नागदेववाडी पाणीपुरवठा संस्था असून सव्वाशे एकर भिज क्षेत्र संस्थेचे आहे. यामध्ये नागदेववाडीतील शंभर एकर व शिंगणापूरमधील सुमारे १५ एकर क्षेत्र आहे. भोगावती नदीवर ५० एचपीचा पंप असून जुनी ५० वर्षांची पाईपलाईन आहे. पंधरा दिवसांपासून स्मशान शेड मेन रोड गल्लीत पाईपलाईनला गळती लागली आहे .यामुळे हजारो लिटर पाणी वाया जात आहे. पाणीपुरवठा संस्थेच्या वतीने दोन खड्डे काढले आहेत. मात्र लिकेज सापडत नसल्याचे चित्र आहे. यामुळे हे खड्डे बुजवलेले नाहीत, परिणामी हे खड्डे अपघाताला निमंत्रण देणारे ठरत आहेत.
एकीकडे पाणीटंचाई व दुसरीकडे हजारो लिटर पाणी वाया जात आहे. संस्थेने हा विषय गांभीर्याने घेऊन तातडीने लिकेज काढावे; अशी मागणी होत आहे. मुख्य गल्लीत खड्डा असल्याने लहान मुले खड्ड्यात पडून अपघात होण्याची शक्यता आहे. यामुळे तातडीने खड्डे बुजवावेत, अशी मागणी होत आहे.

कोट
लिकेज काढण्यासंदर्भात संचालकांची मीटिंग उद्या (शुक्रवारी) बोलावली आहे. पंधरा दिवस लिकेज आहे. खोदाई केली तेथे लिकेज सापडत नाही. ५० वर्षांपूर्वीची पाईपलाईन असल्याने लिकेज वाढत आहेत.
- शुभदा रमेश निगडे, अध्यक्ष, नागदेवाडी पाणीपुरवठा संस्था,