टुडे २

जिल्ह्यात २४६९ शेतकऱ्यांना
मिळणार १३.२८ कोटींचा लाभ
कृषी विभागातील विविध योजना; महाडीबीटी पोर्टलद्वारे अर्ज करण्याचे आवाहन

कुंडलिक पाटीलः सकाळ वृत्तसेवा
कुडित्रे, ता. २७ : राज्यस्तरावर मुख्यमंत्री व उपमुख्यमंत्री यांच्या बैठकीत प्रथम येणाऱ्यास प्रथम प्राधान्य, या तत्त्वावर कृषी विभागातील योजनांसाठी राज्यातील शेतकऱ्यांची निवड महाडीबीटी पोर्टलद्वारे झाली आहे. कोल्हापूर जिल्ह्यातील २ हजार ४६९ शेतकऱ्यांची निवड झाली असून १३.२८ कोटींचा लाभ त्यांना मिळणार आहे. पात्र लाभार्थ्यांकडून १० दिवसांत कागदपत्रांची पूर्तता न झाल्यास तो अर्ज रद्द होणार आहे.
निवड झालेल्या शेतकऱ्यांना मोबाईलवर, तसेच एसएमएस पाठविले आहेत. ज्या शेतकऱ्यांची निवड झाली आहे, अशा शतकऱ्यांनी १० दिवसांमध्ये आवश्यक कागदपत्रांची पूर्तता करायची आहे. असे जिल्हा अधीक्षक कृषी कार्यालयातर्फे आवाहन केले आहे.
पूर्तता केल्यानंतर पात्र लाभार्थ्यांना लगेचच पूर्व संमती मिळणार आहे. फार्मर आयडीच्या आधारे लॉगिन केल्यानंतर पुढील माहिती मिळू शकेल. ज्या शेतकऱ्यांनी ॲग्रिस्टॅक अंतर्गत फार्मर आयडी काढला नसेल. त्यांनी जवळील सीएससी केंद्रातून काढून घ्यावा.
-
जिल्ह्यातील योजनानिहाय लाभाची निवड व रक्कम
शेती यांत्रिकीकरणात एकात्मिक फलोत्पादन विकास अभियान २७ अर्जांसाठी लाभाची एकूण रक्कम ३२ लाख २५ हजार आहे. तर कृषी यांत्रिकीकरण उप-अभियानात १५८६ शेतकऱ्यांना ८ कोटी ५० लाख ११ हजार ४०० रुपये लाभाची रक्कम आहे. सिंचन क्षेत्रात मुख्यमंत्री शाश्वत कृषी सिंचन योजनेत वैयक्तिक शेततळेसाठी २६१ शेतकऱ्यांना १ कोटी ३७ लाख ९१ हजार ३५७ रुपये मिळणार आहेत. एकात्मिक फलोत्पादन विकास अभियानात १२ अर्जांसाठी ९ लाख ८५ हजार ९६४ लाभाची रक्कम आहे.

सूक्ष्म सिंचन घटक
प्रधानमंत्री कृषी सिंचन योजना प्रतिथेंब अधिक पीक (सूक्ष्म सिंचन घटक) या अंतर्गत ३७४ अर्जांसाठी १ कोटी ५९ लाख २९ हजार २७६ रुपये लाभाची रक्कम आहे. तर आरकेव्हीवाय शेततळ्याला प्लास्टिक आच्छादनासाठी १४९ अर्जांसाठी ८२ लाख १० हजार ४०२ लाभाची रक्कम आहे. फलोत्पादन घटकांतर्गत एकात्मिक फलोत्पादन विकास अभियान ६० अर्जांसाठी ५७ लाख ३८ हजार १५५ रुपयांच्या लाभाची रक्कम आहे. अशा प्रकारे एकूण २ हजार ४६९ अर्जांच्या निवडीनंतर १३ कोटी २८ लाख ९१ हजार ५५४ रुपयांची लाभाची रक्कम जिल्ह्यासाठी आहे.
--
कोट
प्रथम येणाऱ्यास प्रथम प्राधान्य या तत्त्वावर कृषी विभागातील योजनांसाठी राज्यातील शेतकऱ्यांची निवड महाडीबीटी पोर्टलद्वारे झाली आहे. कोल्हापूर जिल्ह्यातील २ हजार ४६९ शेतकऱ्यांची निवड झाली असून, १३.२८ कोटींचा लाभ त्यांना मिळणार आहे.
ज्या शेतकऱ्यांची निवड झाली आहे, अशांनी १० दिवसांत आवश्यक कागदपत्रांची पूर्तता करावी.
- जालंधर पांगरे, जिल्हा अधीक्षक कृषी अधिकारी