कागल : मंडलिक कारखाना बिनविरोध, अधिकृत घोषणा १३ जून नंतर

मंडलिक कारखाना बिनविरोध;
अधिकृत घोषणा मंगळवारनंतर

कागल, ता. ६ : लोकनेते सदाशिवराव मंडलिक कागल तालुका सहकारी साखर कारखान्याच्या संचालक मंडळाची पंचवार्षिक निवडणूक कार्यक्रम सुरू आहे. कालअखेर १८ उमेदवार बिनविरोध झाले होते. आज महिलांच्या दोन जागांसाठी दोन उमेदवार व इतर मागास प्रवर्गाच्या एका जागेसाठी एक अर्ज शिल्लक राहील्याने या उरलेल्या तिन्ही जागाही बिनविरोध झाल्या. एकूण २१ जागांसाठी २१ उमेदवारांचे अर्ज शिल्लक राहिल्याने ही निवडणूक बिनविरोध झाली. मात्र, याबाबत औपचारिकता राहिली असून, अधिकृत घोषणा मंगळवारनंतर(ता. १३) केली जाणार आहे.
संचालक मंडळाच्या २१ जागांसाठी ५८ इच्छुक उमेदवारांनी अर्ज दाखल केले होते. १३ जून हा उमेदवारी अर्ज माघारीचा शेवटचा दिवस आहे. कालअखेर १८ उमेदवार बिनविरोध झाले होते. इतर मागासवर्गीय गटात एका जागेसाठी नेताजी बळवंत पाटील यांचा एकच अर्ज व महिला गटात दोन जागांसाठी नंदिनीदेवी नंदकुमार घोरपडे व प्रतिभा भगवान पाटील यांचे दोनच अर्ज शिल्लक राहिल्याने हे तिन्ही उमेदवार बिनविरोध झाले. त्यामुळे आज २१ जागांसाठी २१ उमेदवारांचे अर्ज शिल्लक राहिले. त्यामुळे कारखान्याची ही निवडणूक बिनविरोध झाली.
याबाबत निवडणूक निर्णय अधिकारी तथा कागल राधानगरीचे प्रांताधिकारी सुशांत बनसोडे यांच्याशी संपर्क साधला असता, १३जूननंतर निवडणूकीचे चित्र स्पष्ट होईल. त्यानंतरच याबाबतची अधिकृत घोषणा करण्यात येणार असल्याचे त्यांनी सांगितले.