कागल : शाहू सलग दुसऱ्या वर्षीही बेस्ट को-जनरेशन पॉवर प्लॅन्ट पुरस्काराचा मानकरी.

बेस्ट को-जनरेशन पॉवर प्लॅन्ट
पुरस्काराचा शाहू कारखाना मानकरी

कागल, ता. ७ : श्री छत्रपती शाहू सहकारी साखर कारखान्यास २०२२- २३ चा देश पातळीवरील को-जनरेशन असोसिएशन ऑफ इंडिया या नामांकित संस्थेचा बेस्ट को-जनरेशन पॉवर प्लॅन्टसाठीचा देश पातळीवरील पुरस्कार सलग दुसऱ्या वर्षी जाहीर झाला. पुरस्काराची निवड को-ऑप. सेक्टरमध्ये ८७ किलो परसेंटिमीटर स्क्वेअर बाॕयलर प्रेशरपेक्षा कमी बाॕयलर प्रेशर’ विभागात झाली. २०२१ -२२ मध्ये संस्थेने कारखान्यास बेस्ट को-जनरेशन पॉवर प्लॅन्ट पुरस्काराने सन्मानित केले होते. कारखान्यास मिळालेला हा ६८ वा पुरस्कार आहे. राष्ट्रीय पातळीवरील २५ तर राज्य पातळीवरील ४३ पुरस्कारांचा समावेश आहे.
को - जन असोसिएशनचे डायरेक्टर जनरल संजय खताळ यांनी पुरस्कार निवडीचे पत्र कारखान्यास पाठविले आहे. १६ सप्टेंबरला पुणे येथे को-जन असोसिएशन ऑफ इंडियाचे अध्यक्ष, माजी केंद्रीय कृषी मंत्री व विद्यमान राज्यसभा खासदार शरद पवार यांच्याहस्ते दिमाखदार सोहळ्यात पुरस्काराचे वितरण होईल. याबाबत शाहू ग्रुपचे अध्यक्ष समरजितसिंह घाटगे म्हणाले, ‘सभासद, शेतकऱ्यांचाच हा सन्मान असून, छत्रपती शाहू महाराज यांचे आशीर्वाद व संस्थापक स्व. विक्रमसिंह घाटगे यांनी घालून दिलेली मार्गदर्शक तत्त्वे समोर ठेवूनच कारखाना व्यवस्थापन आणि प्रशासन कार्यरत असल्याने पुरस्कारातील सातत्य टिकून आहे.

चौकट
सभासद, शेतकऱ्यांनी विश्‍वासाने व प्रामाणिकपणाने दिलेली साथ आणि व्यवस्थापनाचे नियोजनास अधिकारी- कर्मचारी यांच्या कष्टाची जोड याचा परिपाक आहे. पुरस्काराचे खरे मानकरी सभासद शेतकरी आहेत. कारखान्याचे संस्थापक स्व. राजेसाहेब यांच्या अमृतमहोत्सवी जयंतीनिमित्ताने मिळालेल्या ६८ व्या पुरस्कारामुळे स्व.राजेसाहेबांना कृतीतूनच अभिवादन आहे.
- सुहासिनीदेवी घाटगे, अध्यक्षा, शाहू साखर