कागल : घरफळ पाणीपट्टी माफ करण्याबाबतचे निवेदन

कागल पालिका शाळेतील पाल्यांची
घरफाळा, पाणीपट्टी माफ करावी
कागल, ता. १८ : कागल नगरपरिषद शिक्षण मंडळामार्फत नगरपालिका शाळेत प्रवेश घेणाऱ्या विद्यार्थ्यांच्या कुटुंबाचा संपूर्ण घरफाळा व पाणीपट्टी माफ करावी, अशा मागणीचे निवेदन मानवता फाउंडेशनचे अध्यक्ष हिदायत नायकवडी व समीर नायकवडी यांनी केली आहे.
निवेदनात म्हटले आहे की, शहरात कागल नगरपरिषद शिक्षण मंडळाच्या सात शाळा सुरू आहेत. खासगी व सरकारी शाळांमध्ये स्पर्धा सुरू असून, पालकांचा खासगी व इंग्रजी माध्यमाच्या शाळांकडे कल वाढला आहे. त्यामुळे पालिकेच्या शाळेतील विद्यार्थ्यांची संख्या दिवसेंदिवस घटत आहे. भविष्यातील धोका ओळखून उपाययोजना करणे गरजेचे आहे. शाळा इमारत, पटांगण यांच्या सुधारणांबरोबरच पटसंख्या वाढण्यासाठी जे पालक आपल्या पाल्याचा नगरपालिकेच्या शाळेत प्रवेश घेतील त्यांच्यासाठी घरफळा व पाणीपट्टी माफ उपक्रम राबवावा. या उपक्रमामुळे शाळांची पटसंख्या वाढून शाळांना पुन्हा चांगले दिवस येतील.