कागल : समरजितसिंह घाटगे कार्यक्रम

8428
कागल : येथे सुरेश काळे या लाभार्थ्यास कर्ज मंजुरी पत्र वितरणप्रसंगी शाहू ग्रुपचे अध्यक्ष समरजितसिंह घाटगे.
........
व्याज परतावा कर्ज योजनेचा
लाभ घ्या ः समरजितसिंह घाटगे

कागल, ता. १९ : ‘राजे विक्रमसिंह घाटगे बँकेच्या भटक्या विमुक्त जाती व जमातीमधील लाभार्थ्यांनी व्यवसायासाठीच्या व्याज परतावा कर्ज योजनेचा लाभ घ्यावा,’ असे आवाहन शाहू ग्रुपचे अध्यक्ष समरजितसिंह घाटगे यांनी केले. येथे महाराष्ट्र शासन अंगीकृत वसंतराव नाईक आर्थिक मागास विकास महामंडळ योजनेंतर्गत राजे बँकेमार्फत मंजूर झालेल्या कर्ज मंजुरी पत्र वाटपवेळी ते बोलत होते.
शिवनाकवाडी (ता. शिरोळ, मूळ गाव तामगाव, ता. करवीर) येथील सुरेश काळे यांना पारंपरिक शेळी-मेंढी पालन व्यवसाय वाढविण्यासाठी राजे विक्रमसिंह घाटगे को-ऑप. बॅंकेतर्फे भटक्या विमुक्त जाती-जमातीमधील समाजासाठी राज्य शासनाने सुरू केलेल्या व्याज परतावा (बिनव्याजी) वसंतराव नाईक विमुक्त व भटक्या जमाती विकास महामंडळ कर्ज योजनेच्या माध्यमातून दहा लाख रुपयांचे अर्थसाह्य मंजूर केले. राजे बॅंकेकडून या योजनेतून अर्थसाह्य घेणारे ते पहिले लाभार्थी आहेत.
घाटगे म्हणाले, ‘अण्णासाहेब पाटील आर्थिक मागास विकास महामंडळ योजनेतून मराठा समाजातील तरुणांना व्यवसायासाठी कर्जपुरवठ्यामध्ये राजे बँक अग्रेसर आहे. आता भटक्या-विमुक्त जाती जमातीमधील तरुणांसाठीही कर्जपुरवठा करण्यात येत आहे. नवीन व्यवसाय सुरू करण्यासह पारंपरिक व्यवसायवाढीसाठी या कर्ज योजनेमुळे प्रोत्साहन मिळणार आहे.’